Социал магъаналы объектлени айнытыугъа къайгъыра

Белгилисича, «РусГидро» биригиуню Къабарты-Малкъарда бёлюмю  регионда социал магъаналы объектлени айнытыугъа уллу къошумчулукъ этеди. Аны бла байламлы  бюгюнлюкде да жандауурлукъ халда  Нальчикде "Спартак" стадионда  пляжда ойналгъан  волейболдан майдан ишлене турады, деп билдиргендиле биригиуден.

 Бусагъатда объектни мурдорун хазырлап бошап, темирден хунасын жарашдырып кюрешедиле. Жууукъ заманда уа тартырыкъдыла, майданнга юзмез къуярыкъдыла, тийишли  ызла салынырыкъдыла эм тёгерек-башны игилендирирча мадар этилликди.  Къурулуш  ишле республиканы волейболдан федерациясы бла байламлыкъда бардырылады.

Бюгюнлюкде Нальчикде "Спартак" стадион иги кесек жаш адам жюрюген, жараула бардыргъан, ойнагъан, заманларын хайыры бла ётдюрген жерледен бирине саналады. Энди пляжда ойналгъан  волейболдан майдан да ачылса, анга бюсюрегенле да аслам боллукълары баямды.  Аны бла бирге мында жараула, турнирле да ётдюрюрге жарарыкъды.

–Бизни баш борчларыбыздан бири республикада спорт айнырча, жамауат саулукълу жашаугъа тартынырча къошумчулукъ этергеди. Аны бла байламлы уллугъа, гитчеге да   кёп жыллан жарарча   тийишли   инфраструктура къурайбыз. Мени оюмума кёре, майданны спорчула эм къараучула да жаратырыкъдыла эм сюйюп келликдиле.  Келир заманда уа спортну бу тюрлюсюнден  жангы чемпионла да чыгъарла деп бек ышанама,- дейди  «РусГидро» биригиуню Къабарты-Малкъарда бёлюмюню таматасы Виталий Тотров.

Эсге сала айтсакъ, майдан ачылгъандан сора, мында ким сюйсе да ойнаргъа эм жараула бардырыргъа боллукъду. Проектге кёре, ол сентябрьни аягъындан кеч къалмай хайырланыргъа берилирге керекди.