Баш борч – жаш адамланы наркотикледен кери тутаргъа

Къабарты-Малкъарда МВД-ны наркотиклени жюрютюуге кёз-къулакъ болгъан бёлюмюню управлениясында «Сабийлерибизни саулукълары эмда къоркъуусузлукълары ючюн» деген ведомствола аралы профилактика жумушну хазырлаугъа эмда бардырыугъа жораланнган кенгеш ётгенди.

Бу акция быйыл экинчи кере бардырыллыкъды. Биринчиси май айда тауусулгъанды, экинчиси уа 1 сентябрьден башлап, 16 октябрьге дери ётерикди, деп билдиргендиле МВД-ны пресс-службасындан.

Сагъынылгъан кенгешни бардыргъан Координация штабны ишине ФСИН-ни КъМР-де управлениясыны, республиканы Жарыкъландырыу эм илму, Саулукъ сакълау, Маданият, Миллетлени ишлери жаны бла эмда жамауат проектле, Жаш тёлюню ишлери жаны бла, Спорт, Цифралы айнытыу, Связь эмда асламлы коммуникацияла министерстволаны келечилери да къатышхандыла.

Бу жумушну баш борчу – ата-аналаны, устазланы эмда жамауат биригиулени къыйынларын акъылбалыкъ болмагъанланы арасында наркотиклеге алданыугъа къажау туруу кючлерин бирикдириудю. Аны себепли мектепледе, сабий юйледе, интернатлада профилактикагъа бурулгъан тюрлю-тюрлю лекцияла, семинарла, «тёгерек столла», юйретиуле, тематика дерсле, интерактив оюнла, конкурсла эмда чыгъармачылыкъ жумушла бардырыллыкъдыла эмда тамамланырыкъдыла. Акциялагъа белгили спортчула, маданият эмда дин къуллукъчула да къатышып, сабий къауум айтылгъан затлагъа бютюнда уллу эс бурурча себеплик этерикдиле.

Билим бериу ишден сора да, бу кампанияны чеклеринде сатыу-алыу жерледе, аптекалада, жаш адамла аслам халда жыйылыргъа сюйген тийреледе тинтиуле бардырыллыкъдыла, сатаргъа жарамагъан затла эмда наркотиклени хайырланнганла бар эселе - ачыкъланырыкъдыла.

Къабарты-Малкъарда МВД-ны наркотиклени жюрютюуге кёз-къулакъ болгъан бёлюмюню управлениясы быллай затланы законсуз жюрютюу шартлагъа тюбегенлеге аны юсюнден алагъа билдирирге чакъырады. Информацияны 02, 102, 8 (8662) 40-49-10 (МВД-ны дежурный бёлюмю), 8 (8662) 49-50-62 номерле бла сёлешип билдирирге боллукъду.