Стратегиялы магъаналы жол – мардалагъа келиширча

Къабарты-Малкъарда "Жашау этерге инфраструктура" миллет пректге кёре иги кесек  жолну жангыртыргъа онг табылгъанды. Ол санда аны чеклеринде бу кюнледе стратегия магъанасы болгъан "Новопавловск – Прохладный – Моздок" жолну 225 метр кесегине тынгылы ремонт этиле турады, деп билдириледи КъМР-ни Транспорт эмда жол мюлк министерствосуну пресс-службасындан.

Жол бла кюн сайын Ставрополь крайгъа, Солдатская элде темир жол станциягъа эм башха жерлеге баргъан иги кесек улоу эм ауур жюк ташыгъан машинала да жюрюйдюле.   Ол  жангыртылгъан кезиуде транспорт тыйгъычсыз жортурча да мадар  этилгенди.  Аны энчиликлеринден бирине тюбю бла темир жол баргъаныды. Анга чырмау салмазча дайым темир жол служба бла байламлыкъ жюрютюрге эм технологиялы     регламентни бузмазгъа тийишлиди. 

Бюгюнлюкде къурулуш организация эски  кёпюрню чигинжилерин, аркъауларын да  кетерип, аланы орунуна жол кенгирек  болурча, ол санда тротуарла да ишленирча  жангыларын  къуюп кюрешеди. Ишлени кезиуюнде аркъауланы салгъанларындан сора,    жауун суу саркъырча мадар этилликди, асфальт жайыллыкъды, къоркъуусузлукъну жалчытырча  темир буруула тартыллыкъдыла  эм башха затла да жарашдырыллыкъдыла.

 Жолну регионну транспорт инфраструктурасыны магъанасы уллуду. Ол себепден объектде тынгылы материалла бла жангы технологияла хайырланыллыкъдыла. Аны себепли ол иги кесек заманны уллу ауурлукълагъа тёзерча боллукъду. Саулай алып айтханда, ишле болжалдан кеч къалмай эм бир тюрлю  тыйгъычсыз бардырыладыла.

Эсге сала айтсакъ, объект быйыл кюз артындан кеч къалмай   хайырланыргъа берилирге керекди.