От жагъада ушакъла, чыгъармачылыкъ ингирле, унутулмазлыкъ такъыйкъала

Пятигорскда Комсомол талада «Машук – 2026» битеуроссей жаш тёлю форумну жабылыуу болгъанды, бу кюнледе уа аны эсеплери ачыкъ этилгендиле.       

Алай бла быйыл анга Россейден бла жууукъдагъы тыш къыралладан 14-35-жыллыкъ 2200-ден аслам адам къатышхандыла, аланы араларында устазла, студент самоуправленияланы келечилери, «Биринчилени атламлары» къымылдауну насийхатчылары, жаш алимле, вузланы бла колледжлени преподавательлери, къырал миллет политиканы бардырыу жаны бла устала, Федерал сабий жамауат советге киргенле да болгъандыла. Форум кеси уа эки кесекден къуралгъанды. Биринчиси – «Абадан болуу» - юйретиуге бла билим бериуге жораланнганды. Экинчисинде уа – «Бирлик» - жаш адамла жамауатны бирикдирген, огъурлулукъну ниетлерин жайгъан амалланы излегендиле, кёп маданиятланы келечилери болгъан жерде ишлеуню энчиликлерине тюшюннгендиле.

Форумда баш магъананы быйыл Президентни оноуу бла Россейни халкъларыны бирликлерини жылы болгъаны тутханды. Анга кёре уа Машук халкъланы араларында шуёхлукъну кючлеген, арада халланы тинтген майдан да болгъанды. Ёзек тема «Машукну жюрегинде» регионланы герблери суратланнганларында, къыралны 200-метрлик байрагъы жайылгъанында, жарыкъландырыу ушакъларында да эсленеди.

Жаш фахмуланы ачыкъларгъа, аланы башламчылыкъларын жашауда бардырыргъа себеплик этиуден сора да, форумгъа устазны инсанны дуниягъа кёз къарамыны тохташыуунда, аны ниет жаны бла ёсюуюнде устазны жерин кёргюзтюрге эмда аны даражасын кётюрюрча мадарла излерге борч салыннганды. Аны толтура, жыйылгъанла жаш устазлагъа къаллай себеплик этерге боллугъуну юсюнден да оюмларын билдиргендиле. Энчи аскер опрациягъа къатышханлагъа бла ветеранлагъа эс бёлюу да баш темаладан бири болгъанды. Аны чегинде жаш адамла Россейни Жигитлери, «Жигитлени заманы» программагъа къатышханла - Россейни Билим бериу эм илму министерствосуну къырал жаш тёлю политика жаны бла департаментини башчысы Сергей Бойко, Шимал кавказда терроризмге къажау операцияда, Сирияда аскер къазауатда, СВО-да болгъан Алексей Безруков, Кишиликни Орденини кавалерлери Виктор Дядюра эмда Валерий Митрофаненко – бла тюбешгендиле.

Биринчи сменнге баргъанла беш жаны бла – Ата журтха къуллукъ этиу, къурау иш, тарых кертилик, тёлюлени араларында байламлыкъланы сакълау, къыралны халкъларыны бирликлери - юйретиу амалланы къауумун жарашдыргъандыла. Андан сора да, ала бусагъатдагъы жашауну излемлерине кёре акъылбалыкъ болмагъанлагъа майданланы къалай кёргенлерин айтхандыла, юйретиуню, юйюр бла байламлыкъ жюрютюуню «навигаторун» жарашдыргъандыла, «Ата журтну, Инсанны, Акъылны бла Жюрекни къоруулаучусу» деген тёртсагъатлыкъ ушакъны бардыргъандыла.

Экинчи смендегиле жаш адамланы 1200-ден аслам оюмларын тинтгендиле, студент самоуправление ишини баш борчларын эмда аны жаш тёлю политиканы бардырыугъа жууаплы органла бла байламлыгъы неде болгъанын белгилегендиле. Андан тышында «Биринчилени атламларына» 20 билим бериу форматны, жаш алимни этика кодексин, вузланы бла колледжлени преподавательлерине «Кёп миллетли студент арада юйретиуню бардырыу» методика пособиени жарашдыргъандыла, волонтёрланы «Дунияда орус тилни келечилери» биригиуню къурагъандыла.

Эки сменде да форумчулагъа юч клуб – «Бирлик» (битеуроссей бирликни кючлерча амалланы жыйышдырыу), «Инсан – билим бериуде» (шёндюгюлю устазлыкъны магъанасын ангылау), «келир заман» (жалгъан интеллектни да хайырлана, юйретиу ишни технологияла бла байыкъландырыу) – ишлегендиле.  Конкурсланы юслеринден айтханда, форумну хар кесегинде да 40-шар башламчылыкъ къорууланнганды, араларында эм игилени жашауда толтуруугъа 8 миллиондан аслам ахча берилгенди.

Жандауурлукъгъа да уллу эс бёлюннгенди: 150-ден аслам жаш адам 65 литрге жууукъ къан бергендиле, дагъыда 75-си уа сюек жиликни донорларыны федерал тизмесине салыннгандыла. «Аскерчиге жылыуну саугъала» акцияны чегинде форумчула 57 медицина керекле, олтуруча, жатарча керекле, жау эслемезча аула, жолоучулукъда хайырланылгъан жастыкъла эм башха затла хазырлагъандыла, ала барысы да энчи аскер операция болгъан жерге жиберилгендиле.

Форумну жарыкъландырыу кесегине уа сейир маданият-айнытыу программа да къошулгъанды. Аны хайыры бла жаш адамла кеслерин къаялагъа ёрлеуде, турист жолланы ётюуде сынагъандыла, лазертаг, волейбол, баскетбол, футбол ойнагъандыла, батутлада жарау этгендиле, къытай тилге юйрене, чай ичгендиле, радио бла жюрютюлген машиналада баргъандыла. Пятигорскну ариу, тарых жерлерине жолоучулукъла, Машукга бла Бештау таулагъа ёрлеу а эслеринде къалырча болгъанды. Ингирле да сейир ётгендиле: Халкъланы бирлигини ингири къуралгъанды, Лермонтовну бла Пушкинни чыгъармалары окъулгъандыла, аскер оркестрни чыгъармачылыгъына жораланнган тюбешиу, «Машукну жангы сыфатлары» деген аты бла фахмулу жаш адамланы эришиулери, жыр эришиуле, викторинала, от жагъада ушакъла болгъандыла.