Таза суу бла сылтаусуз этерча

Къабарты-Малкъарда «Жашау этерча  инфраструктура» миллет проектни «Коммунал инфраструктураны жангыртыу» федерал программасына  кёре   2025-2027 жыллада ичер суу бла жалчытырыкъ  22 объект ишленирикди неда  жангыртыллыкъды.   Аладан 14-сю муниципалитетледеди, деп билдириледи КъМР-ни Къурулуш эмда жашау журт-коммунал мюлк министерствосундан.

Сагъынылгъан программаны чеклеринде  былтыр Хасанияны къатында  Нальчик сууну боюнунда  баш водозаборну эм сууну тазалагъан станцияны да жангыртыу ишле башланнгандыла. Тийишли жумушланы тамамлар ючюн 1,8 миллиард сом къоратыллыкъды.

 Алгъаракълада билдиргенибизча, иги кесек бетон къуюлуп, объектни мурдору  салыннганды эм суу тозуратмазча мадар  этилгенди. Бусагъатда уа ташла бла ичин толтурадыла эм  иги тепленирча  мадар  этедиле. Андан сора къызыл кирпич бла    къабыргъаларын къалап башлагъандыла. 

Аны бла бирге бюгюнлюкде геодезия ишле тамамланнганларындан сора  энчи техника бла насос эм электролиз  станцияла боллукъ жерлени да  къазып башлагъандыла. Мурдорун хазыр этгенлеринден сора быргъыланы тартырыкъдыла. Проектге кёре оборудованиясы толусунлай жангыртыллыкъды эм иши автомат халда ишлерча къураллыкъды.

Эсге сала айтсакъ, комплекс 1962 жылда ишленнгенди. Ол федерал магъаналы курортну, тёгерегинде эллени да ичер суу бла жалчытады.  Андан бери адам санына иги кесек къошулгъаны себепли арт заманлада ол борчун тынгылы толтуралмайды. Аны хатасындан майдан башлап «Нальчик» курорт бла тёгерегинде элле суулары жетмей къыйналадыла.

Сёз ючюн, проектге кёре ол 700 минг кубометр суу бла жалчытыргъа керек эсе, бюгюнлюкде жаланда 70-80 минг кубометр береди. Аны бла байламлы жайда сууну график бла жиберирге тюшеди.  
Проект жашауда бардырылса, таза суу бла   эллени толусунлай жалчытырыкъды. Аны бла бирге курортну айнырына себеплик этерикди – къонакъ юйлени, санаторийлени эм башха объектлени да санына танг кесек къошуллукъду.