Хыйлачылагъа эки кере алданнганды

Прохладный шахарда жашагъан 75-жыллыкъ тиширыу кесин хыйлачылагъа алдатханды, деп билдиргендиле КъМР-де МВД-ны пресс-службасындан.

Бу адам айтханнга кёре, анга юйюнде телефонуна ким эсе да сёлешип, кесин медицина учрежденияны келечисича танытханды, сора мычымай флюорография этерге керексиз деп, СНИЛС-ни номерин айтдыртханды. Пенсиячы тиширыу аны этгенди, артда уа районну больницасына сёлешип соргъанда, ала анга сёлешмегенлерин билгенди. Башы палахха къалгъан болур деп къоркъуп, ол полициягъа баргъанды. Анда аны заявлениясын алгъандыла, кесине да хыйлачыла адамланы асламысында къалай алдаучуларын ангылатып, билмеген, танымагъан адамла бла сакъ болургъа чакъыргъандыла.

Болсада бу тиширыу,  аланы эсгертиулерин унутуп, талай замандан хыйлачыланы ауларына энтта да тюшгенди. Бу жол ала анга ахчагъызны бизни бла шуёхлукъ жюрютмеген къыралгъа жибергенигиз ючюн уголовный жууапха тартылыргъа тийишли ишге къатышхансыз деп, жазадан къутулурча «юрист» бла шагъырей болургъа чакъыргъандыла.

Ызы бла талай кюнню ол адам, бу тиширыугъа сёлешип, айтханын этерча къысып тургъанды. Сора бу хапарланы бир кишиге да эшитдирмегиз деп, кесин кюч ведомствону ишчиси кибик танытдыргъан биреу да сёлешгенди.

Юч кюнден сора ол «юрист» ахчагъызгъа къоркъуу барды деген сылтау бла битеу болгъан сомларын аны аллына келлик адамгъа берирге чакъыргъанды. Тиширыу 583 минг сом жыйып, барын да хыйлачылагъа жибергенди. Аны бла анга сёлешиу да къалгъанды.

Бу шартны юсю бла КъМР-де МВД-ны «Прохладненский» бёлюмю РФ-ни Уголовный Кодексини 159-чу статьясыны 3-чю кесегине тийишлиликде терслеу иш ачханды.