Окъуучуларыны жюреклерине къыйналмай жол табады

Бизге ыразылыкъ къагъытла келе туруучудула. Бу да аладан бириди. Аны жазгъан Тырныауузну 3-чю номерли школуну малкъар тилден бла адабиятдан устазы Курданланы Иринады.

Быйыл къыралда Халкъланы бирлигини жылын белгилейбиз. Аны бла байламлы, багъалы редакция, арабызда кёп жылладан бери бет жарыкълы урунуп келген устаз жолдашым бла газет окъуучуларыбызны шагъырей этерге сюеме. Тырныауузну Этезланы къарындашлары атлы 3-чю номерли школда къыркъ жылдан артыкъ ишлеп келген устаз Лариса Анатольевна Блинова, районну жаш тёлюсюню асламысын орус тилге бла адабиятха юйрете, кёплеге адамлыкъны бла шуёхлукъну юлгюсю да болгъанды.

Ишге келген биринчи кюнюнден окъуна ол кесин усталыгъын сюйген, аны керти да жюреги бла сайлагъан устазча танытханды. Къуру сабийлени угъай, абаданланы, ата-аналаны жюреклерине да къысха жол тапханды. Аны дерслери сабийлени узакъ маданиятлагъа, сёзлени дунияларына жолоучулукъгъа элтип къайтарадыла.

Бусагъатдагъы заманны излемлерине кёре, жангы амалланы тири хайырланнганы ючюн аны бир дерси башхасына ушамайдыла. Интерактив, чыгъармачылыкъ, энчи болсун, дерс тюрлюлени хайырлана, ол аланы сахна оюннга ушатады. Андан сора да, патриот сезимни кючлеуге, Ата журтларына, туугъан жерлерине да кертичиле болургъа юйретген ушакъланы бек магъаналыгъа санайды. Лариса Анатольевна жашау дерсле береди дерге да боллукъбуз.

Барыбыз да билгенден, Тырныауузда кёп миллетлени келечилери жашайдыла, аланы сабийлери уа школлада окъуйдула. Устаз аланы араларында шуёхлукъну жаратып, аны жылла бла сакълай билирге юйретир ючюн да аз къыйын салмагъанды. Россейде жашагъан халкъланы хар бирини энчиликлери болгъан маданиятларына бла адабиятларына уллу хурмет этерге юйретеди ол сабийлени.

Окъуучулагъа жаланда устазлыкъ этип къоймай, аланы жюреклерине жол таба билгенди. Тасхаларын, жарсыгъан затларын да окъуучулары келип сюйген устазларына айтыргъа бек сюе эдиле. Ол аланы барын да эшитип, барына да тынгылап, хар бирине бир жол излеп, акъыл юйрете, кесича аналыкъ да эте эди. Аны себепли болур, школну эртте бошап кетгенле окъуна кёп жылланы ичинде ол байламлыкъны юзмей сёлешедиле, байрамлада алгъышлайдыла. Устазны салгъан къыйыны хайырлы болгъандан уллу саугъа уа къайда?!

Лариса Анатольевна Къазахстанда Семипалатинск шахарда туугъанды. Школну жетишимли бошап, атасы-анасы айтханны этип, Караганда шахарда университетде экономика факультетге кирип, окъуп башлагъанды. Аны жаратмай кетип, орус тил бла адабият факультетни сайлап, ары окъургъа киргенди. Анда айырмалы студент болуп окъугъанды.

Университетни бошагъандан сора, аны Чарск шахаргъа ишлерге жибергендиле. Анда ишлей тургъанлай, Дондагъы Ростовну университетинде аспирантурагъа киргенди. Юйдегили да болады. Баш иесин Тырныауузгъа ишлерге жибергенде уа, аны биргесине келеди. Алгъа ПТУ-да жети жылны ишлегенди, ызы бла ючюнчю школгъа ишге чакъырадыла да, андан бери школуна кертичиликде 40 жылдан артыкъ заманны урунады. Жарсыугъа, бир бёлек жылдан баш иеси дуниядан кетип, эки сабийчик бла жангыз къалады. Алай къаты низамлы тиширыу сынмагъанды, жашауун, ишин да тийишли бардыргъанды.

Аны адамлыгъы, адеплилиги, ариу къылыгъы, ишин уста билгени, башхаладан да аны излегени туура кёрюнюп турадыла. Аны юсюнден мен жаланда ариу сёзле эшитгенме адамладан, ол а игилик тюйюлмюдю. Бийик профессионаллыгъы ючюн аны окъуучулары да къырал сынамладан бийик балла бла ётгендиле.

 Лариса Анатольевнаны эрттеден таныйма. Аны къолунда сабийлерим да окъугъандыла.  Кесим да устазма, кёп жылланы школда ишлейме. Сабийлени аны сюйгенлерин, анга хурмет этгенлерин кёрсем, бек къууанама. Къайсы сабийге да сёз, жол таба биледи. Ол ишинде бийик жетишимлеге жетгенди, кёп саугъалагъа да тийишли болгъанды.

Окъууну бла билимни бек магъаналыгъа санагъанды ол. Эки жашын да ёсдюрюп, бийик билим алдыргъанды. Бусагъатда ала юйдегили болуп, башха шахарлада жашайдыла. Лариса Анатольевна туудукълары бла жыл сайын башха-башха шахарлада солургъа чыгъадыла. Тамата жашы Александр аты айтылгъан врачды. Ол энчи аскер операциягъа къатышып, анда ауур жаралы да болгъанды. Анда кёргюзтген жигитлиги ючюн майдалла бла орденлеге тийишли болгъанды.

Чынтты устазгъа бла аламат анагъа, огъурлу инсаннга жюрегимден ыспас этерге сюеме. Анча сабийге орус тилни бла адабиятны сейирлик дунияларына жол ачып, ол жолда ажашмай барыргъа юйретгени ючюн.