Айырмалылагъа – майдалла, саугъала да

Кёп болмай Къабарты-Малкъарда Ич ишлени министерствосунда  Россейни халкъларыны бирлигини кюнюне атап патриотлукъ  жыйылыу бардырылгъанды. Анга КъМР-ни Правительствосуну Председателини орунбасары Залим Кашироков,  КъМР-де МВД-ны башчысы  полицияны генерал-лейтенанты Вячеслав Крючков, миллетлени ишлери  эмда жамауат проектле жаны бла министрни къуллугъун толтургъан Гергъокъланы Жамболат, Россейни МВД-сыны Шимал-Кавказ институтуну таматасы полицияны полковниги  Юрий Сапронов, дин къуллукъчула, СВО-ну ветеранлары эм къыйын болумгъа тюшген юйюрледен сабийле да къатышхандыла, деп билдиргендиле КъМР-де МВД-ны пресс-службасындан. 
Тюбешиуню башлай, Вячеслав Крючков халкъны бирлиги – ол  миллионла бла адамланы къыйын кезиуде бирлеше билгенлериди, адет-тёрелеге сый бериудю, аланы сакълауду, деп чертгенди. «Анга кёре бизни борчубуз, «бирлик» деген сёз жаланда ариу сёз болуп къалмай, жамауат аны магъаналылыгъын сезерча этергеди эм жетишимли ишлергеди», – дегенди. 
Айтылгъан сёзлеге къошула, Залим Кашироков бла Гергъокъланы Жамболат да Россейни деменгилилиги – миллетлерини араларында келишиулюкде, бир бирни багъалауда, шуёхлукъда да болгъанын  белгилегендиле. 
Ахырында  ич ишле органлада къуллукъ этгенлени араларында  жетишимле болдургъанла  ведомстволу  майдалла, сыйлы грамотала эм ыразылыкъ къагъытла бла саугъаланнгандыла. Аны бла бирге чынлары кётюрюлгенлеге министр погонла  бергенди. 
Дагъыда Миллетлени ишлери   эмда жамауат проектле жаны бла министерствону атындан да кёпле   сыйлы грамотала бла саугъаланнгандыла.  
Ахырында жыйылгъанланы уллу концерт программа сакълагъанды.