Медиклени къошумчулукълары

«Сабийни школгъа хазырла» деген жандауурлукъ изеуню чеклеринде Къабарты-Малкъарны медиклери 500 жашчыкъгъа бла къызчыкъгъа окъууда керекли затла алып бергендиле, деп билдиргендиле  КъМР-ни Саулукъ сакълау министерствосундан.  
Алай бла республиканы медицина организацияларында ишлегенле, бирге ахча жыйып, КъМР-ни Жаш тёлюню ишлери жаны бла министерствосуна ётдюргендиле эмда бергендиле. Аны иги кесек сабийге жангы окъуу жылгъа хазырланыргъа болушхандыла.  
Эсге сала айтсакъ, жыл сайын КъМР-ни Саулукъ сакълау министерствосу школгъа хазырланыу жаны бла жандауурлукъ ишге тири къатышады эмда  аны баш болушлукъчуларындан бири болгъанлай къалады. Аны бла медикле  социал жууаплылыкъларын, сабийлени къыйын кезиулеринде уллу кёллюлюк этмегенлерин кёргюзтедиле.  
Быллай жандауурлукъ изеуню бардырыуну магъанасы – уллу, къолайсыз, къыйын болумгъа тюшген юйюрледен сабийлеге,  ёксюзлеге эмда Россейни жангы регионларындан школчулагъа къайгъырыуду, жангы окъуу жылгъа  хазырланыргъа болушууду.