Шахарла бла элле бютюн айбат болурча

Къабарты-Малкъарда «Жашау этерге инфраструктура» миллет проектге кирген «Иги шахар болум къурау» федерал проектге кёре жыл сайын иги кесек жер жангыртылады. Быйыл да битеуроссей конкурсда хорлагъан юч проектге  321 миллион сом бёлюннгенди. Аны иги кесеги неда 290 миллион сому федерал бюджетге жетеди.

Сагъынылгъан проектни чеклеринде быйыл 38 чакълы жамауат жер ишленирикди. Ол санда  Тырныаууз, Бахсан, Нарткъала, Къашхатау шахарлада, Бабугент, Анзорей, Аргудан, Баксаненок, Огъары Жемтала, Огъары Куркужин, Герпегеж, Жангы Малкъар, Заречное, Каменномостское, Октябрьское, Псыгансу эм Янтарное элледе да  скверле бла аллеяла къураллыкъдыла.  Бюгюнлюкде объектлени алтысында ишле тамамланнгандыла.

Саулай алып айтханда, игилендириу ишлеге 600 миллион сом къоратыллыкъды. Былтыр бу заман бла тенглешдиргенде, ол  56 процентге кёпдю.

Алай бла жууукъ заманда  Нальчикде  2-чи Таман дивизия атлы орамында Буз къаланы къатында  жаш тёлюге деп 1,5 гектарда экстрим-парк къураллыкъды. Аны юсюнден   Нальчик сууну жагъасында сабий-жаш тёлю спорт кластер проектни бардыргъан кезиуде окъуна айтылгъан эди.

Биринчи кезиуде мында «памп-трек», «скейт-парк», «скейт-бол» эм сабийле ойнаучу майдан да къураллыкъды. Планнга кёре,  администрацияны юйю, ачыкъ башлы амфитеатр, солуучу эм машинала сюелирча жерле да жарашдырыллыкъдыла.

Чегемде да бюгюнлюкде  былтыр иги шахар болум къурау битеуроссей конкурсда хорлагъан «Шахар жибермейди» деген Паркны къурулушу барады. Аны уллулугъу 2,5  гектаргъа жууукълашады, къурулушуна 91 миллион сом къоратыллыкъды.  Мында бульвар, гитче кёлчюгю бла  солуучу жер, сабийле ойнарча, спорт бла кюреширча майданла да жарашдырыллыкъдыла. Тёгерек-башны жашиллендирирча да мадар этилликди - терекле, юлкюле эм гюлле да орнатыллыкъдыла.   Аны себепли  тийреде жашагъанла  заманларын зауукълу ётдюрюрге, спорт бла  кюреширге да онг табарыкъдыла. 

Майскийде уа Энгельс атлы орамда эки гектар чакълы бирде «Заря» деген парк къураллыкъды. Аны проекти шахарчыланы тири къошумчулукълары бла жарашдырылгъанды. Мында баш жер Россейни Жигитлерини аллеясына берилликди. Андан сора да, сабийле ойнарча, спорт бла кюреширча майданла, ашаучу жер, шинтикле, чыракълы чыпынла, кир-кипчик атарча орунла эм машинала сюелирча жер да боллукъду.

Андан сора да, Нарткъалада шахарны ара майданын жангыртырыкъдыла,  Карагач, Прималкинское, Приречное элледе да  скверле ишленирикдиле эм башха жамауат жерле да тапландырыллыкъдыла. 

Эсге сала айтсакъ, Къабарты-Малкъарда сагъынылгъан проектге кёре  2019- 2024 жыллада  863 чакълы  жамауат жер игилендирилгенди.  Ол санда былтыр да анга  эки жыйырма чакълысы къошулгъанды.  Аланы арасында Нальчикде Хорламны паркы бла Каштанла ёсген аллеяны да энчи  белгилерге боллукъду.

Интернетде материаллагъа кёре Магометланы Сулейман хазырлагъанды.
Поделиться: