Хайырланыучула электрокюч бла сылтаусуз болурча

Къабарты-Малкъарда электрокюч комплекс кюз эм къыш кезиуге хазыр болурча подстанциялагъа, ток ызлагъа эм башха объектлеге да заманында къаралады, бузулгъан эм тозурагъан аберилери жангыртылады. Аны бла байламлы быйыл жылны башындан бери «Россети Северный Кавказ» – «Каббалкэнерго» биригиуню келечилери 35-110 кВ. кюч бла ишлеген онсегиз чакълы подстанциягъа ремонт этгендиле. Ол санда эски болгъан жау выключательлени вакуум тюрлюлерине алышхандыла, деп билдиргендиле ток бла жалчытхан биригиуден.

Алай бла жангы оборудованияны хайыры бла Тырныаууз шахарны жартысын, Шитхала, Крем-Константиновка эм Урван элледе жашагъан 15 мингнге жууукъ  абонентни эм 21 социал магъаналы объектни ток бла тынгылы жалчытыргъа онг табылгъанды. Жылны ахырына энтта да 35-110 кВ кюч бла ишлеген 31 подстанциягъа къараллыкъды - ремонт этилликди эм оборудованиялары да алышынырыкъдыла.

Эсге сала айтсакъ, токну ёчюлтгенлени вакуум тюрлюлери сынамлыдыла, шумсуз ишлейдиле, ремонт этерге тынчдыла, бузулмай иги кесек заманны ишлейдиле эм уллу къоранчлагъа да келтирмейдиле. Аланы энчиликлерини  юсюнден айтханда, уллу тюйюлдюле, от тюшерине къоркъуусуздула эм хауагъа заран жетдирмеген экология жаны бла да къыйматлыдыла. 

Саулай алып айтханда, профилактика халда бардырылгъан техника ишле 2021 жылдан бери бардырыладыла. Ишлени кезиуюнде подстанцияла эм башха электрокюч объектле борчларын ажымсыз толтурурча, жай иссиледе бла сууукълада сылтаусуз ишлерча этиледи. Саулай алып айтханда, сагъынылгъан кезиуде 24 подстанцияда 130 эл газ салыннганды эм ток ёчюлтюучюлени да вакуум тюрлюлерине  алышындырылгъандыла.

Интернетде материаллагъа кёре 

Магометланы Сулейман хазырлагъанды.
Поделиться: