Окъургъа бери келгенине аз да сокъуранмайды

Къабарты-Малкъар къырал университетде жер-жерледен келген жаш адамла аладыла билим. Аладан бири уа Мирослава Васильченкоду. Ол бери ДНР-ден келип окъуйду, мектепни алтын майдалгъа бошагъанды, дерследен тышында да, жамауат жашаугъа тири къатышады.

Мирославаны сабийлиги Донецк Халкъ Республиканы Снежное атлы шахтёр шахарчыгъында озгъанды. Анда, аны сюйген эмда багъалагъан юйюрюню къатында къозгъалгъанды аны чыгъармачылыкъгъа бла илмугъа сейири. «Атам-анам мени  кёллендиргенлей, насийхатчылыкъ этгенлей турадыла. Аласыз бери келирге да таукел болаллыкъ тюйюл эдим»,– дейди ол кеси уа.

Школну уа къыз, белгиленнгенича, «алтыннга» бошагъанды. Аны бла бирге уа мектепни жамауат жашаууна тири къатышханы  ючюн махтау къагъытлары да кёпдюле. Бир къырал сынаулагъа да ышаннгылы хазырланнганды: репетиторлагъа да  жюрюгенди, онлайн халда кеси аллына да кёп затха юйреннгенди.

Журналист усталыкъны сайлагъанына уа тамата къарындашы юлгю болгъанды. Жаш да КъМКъУ-ну журналистика факультетинде билим алгъанды эмда орус литератураны, шатык сёлешиуню жаратхан къыз аны ызы бла баргъанды.  «Къарындашым манга  хар заманда да болгъанды юлгю. Аны кёрюп, мен да сёз бла ишлерге, адамла бла ушакъла бардырыргъа, аны бла бирге уа ол затланы барысын да халатсыз, бийик усталыкъ  даражада этерге сюйгенме», – дейди андан ары Мирослава. 

Ол уллу шахарланы сайларгъа сюймегенди, ала анга артыкъ сейир тюйюлдюле. Къабарты-Малкъар а анга билим  алыргъа эмда чыгъармачылыкъ хунерин айнытыргъа  тынчлыкълы, ышаннгылы жерча кёрюннгенди. Мында, уллу мегаполиследеча, тохтаусуз ашыкъ-бушукъ,  гузабалыкъ да болмагъанын жаратады. Аллай болум а билим алыргъа, айныргъа да талпындыргъанын айтады.

Университетде окъуп башлагъан биринчи кюнлери уа аны эсинде кёпге сакъланырыкъдыла. Ол биргесине окъугъан нёгерлери бла дерсге кеч къалып келгенди. Ашханадан заманында чыгъалмай, бир кесек чырмалгъандыла, бу болум а тенглери бла шуёх болуп къалырына да себеплик этгенди. Энди бюгюнлюкде ол кюнню ала барысы да ышарып эсгередиле.

Алыкъа КъМКъУ-гъа окъуугъа киргинчи дери да къыз аны мурдорунда бардырылгъан «Виват, студент» деген эришиуню, сейир форумланы  барлыкъларын да билгенди. Бу проектле анга терен магъаналы кёрюннгендиле эмда мында билим алыргъа итиндиргендиле.

Ал кезиуден окъуна башлап, ол студент жашаугъа тири къатышып тебиреген эди.

– Хар зат да «СГИ-ни биринчи курсуна алыныудан» башланнганды. Насыбым тутуп, ары жаланда ингирге къатышхан студентлени санында тюшюп къалмай, аны бардырыучусу болгъанма.  Ызы бла уа аллай ингирлерим кёпден-кёп бола башладыла: «Студент жаз башыны гран-прии», «Жарыкъны урууу», «Августчукъ». Алай эсе да, аланы арасында «Виват, студент-2024» эришиуге къатышханым, анда жетишимим эсимде бек къалгъанды. Аллай муратым а мектепден бери да бар эди, энди уа ол умутум толгъанды. Бюгюнлюкде билгеними, сынамымы кесимден гитчелеге юйреталгъаным, аланы эслеринде къалырча байрамланы къураялгъаным ючюн а насыплыма, – деп хапарлайды ол андан ары.

Россейде къалып, мында ишлер муратдады Мирослава. КъМКъУ-ну диплому уа анга жаланда бийик билим алгъанына шагъатлыкъ этген къагъыт тюйюлдю, ол кесине кёп затны сыйындырады: эсгериулени, шуёхлукъну, сезимлени да. Къабарты-Малкъаргъа келип, мында билим алгъанына аз да сокъуранмагъанын, бютюнда башха жерни кёз аллына окъуна келтиралмагъанын айтады. Университет анга ышаннгылы  билим берген, аслам затха тюшюндюрген окъуу юй болгъанлай къалады.