«Мында умутландыргъан жашла кёпдюле»

 Бу кюнледе мингден аслам спортчу Къабарты-Малкъарда жыл сайын бардырылгъан жай окъуу-юйретиу жыйылыулагъа келгендиле. Жараула, спортчуланы жылларына кёре юлешинип, беш кюнню барлыкъдыла, деп билдиредиле КъМР-ни Спорт министерствосундан.

Келгенлени эки къауумгъа юлешгендиле: гитчеле (16 жылгъа дери). Ала «Беш жюзюк» академияда окъуйдула. Таматала – ала универсал спорт комплексде кюрешедиле. Битеу бирге кюйюзге Россейни 50 регионундан 1000-ден аслам гёжеф чыкъгъандыла. Алагъа Къазахстандан эм Бахрейнден да атлетле къошулгъандыла.

«Была жаланда окъуу дерсле тюйюлдюле, тутушууда кючню сынауду. Биз Физкультурникни кюнюне эм Россейни халкъларыны бирлигини жылына жораланнган кезиулю жай жыйылыула бардырабыз. Мында хазырланыугъа заман къоратылмайды – хар спортчу алты-жети сермеш бардырады, эришгенле хар заманда тюрленедиле, ол а бек уллу тёзюмлюк излейди эм багъалы сынау береди», - дегенди Олимпиада резервни С.Х. Ниров атлы спорт школуну таматасы Сафарби Таов.

«Жыйылыула СКФО-ну бла Россейни биринчилиги бла байламлыдыла. Жангы залла ачылгъанлары бла дзюдону даражасы да жангы бийиклеге чыкъгъанды. Аллай болумладан сора секцияла толуп башлагъанларын кёребиз. Бюгюнлюкде бу залда бизни махтаулу олипиадачыларыбызгъа жангы жулдузла боллукъла да кюрешедиле. Бизни баш борчубуз - сабийлени орамдан эм осал затладан айырыуду. Алагъа кеслерини республикасын эм Ата журтун махтаулу этиуню жолун кёргюзтюудю», - дегенди КъМР-ни Дзюдодан федерациясыны президенти Нурмухамед Емкужев.

Жараулагъа къатышханланы санында 14-жыллыкъ дагъыстанлы спортчу къыз Мариям Шамхалова да барды. Ол 60 адамдан къуралгъан къауум бла келгенди. «Мен бери келгенли ючюнчю кюн болады, битеу санларым ачытханлыкъгъа, хар затны да жаратама. Мында умутландыргъан жашла кёпдюле. Мени баш муратым сынам алыргъады», - дегенди Мариям.

Къарачай-Черкесден келген Батчаланы Денис а халкъла аралы класслы спортну устасыды. Ол Нальчикге гитчелигинден бери да келип турады. «Мен мында кесими юйюмдеча сунама. Жаш тёлю артха турмазгъа кёллендиреди. Беш кюнню ичинде бу ишге толусунлай кесинги берирге боллукъса», - дейди Денис.

Жыйылыула 10 августха дери барлыкъдыла. Аланы къурагъанла белгилегеннге кёре, жашау эмда спорт сынауладан бир бирге юлюш этиу тёлюлени бла регионланы араларында быллай тюбешиулени баш муратлары болгъанлай къаладыла.