Адам жашамагъан фатарда газ ючюн тёлерге керекмиди?

Юйню неда фатарны иеси анда хайырланылгъан кёк отлукъну багъасын тёлерге борчлуду. Алада адам жашамай эсе уа,  иш къалай боллукъду? Анга «Газпром межрегионгаз Нальчик» предприятияда жууап бергендиле.

Бизни республикада арт кезиуледе кёп юй ишленеди. Алай алада уа бир-бир фатарла бошуна тургъан шартла бардыла. Башхача айтханда,  юйде киши да жашамайды, алай газ ючюн квитанцияла уа ай сайын келедиле.

Законну излеми былайды: газ ызгъа къошулгъан фатарда адам жашаса, жашамаса да, аны багъасын тёлерге керекди. Ол борч юйню иесине салынады. Аны тёлемезге уа жаланда бир амал барды – счётчик орнатыу. Алай болса, къоратылгъан газ нормативге угъай, аны эсеплегенине кёре тергелликди.

Магъаналы излем: газ бла жалчытхан компаниягъа счётчикни кёргюзтюулерин ай сайын жиберирге керекди. Сиз кёк отлукъну хайырланмай да туругъуз – башхасы жокъду, билдирирге уа керексиз. Сюйсегиз абонент службагъа барып неда интернет бла. «Акъыллы счётчик» салсагъыз а,  информацияны ол ары кеси ашырып турлукъду.

Фатарда жууукъ кезиуде адам да жашарыкъ тюйюл эсе, ары келген газны тыяргъа жарайды. Алай этерча компаниягъа тийишли заявление жазаргъа керекди.

Алай борч этилген эсе уа,  аны тёлемей онг боллукъ тюйюлдю. Ол бир-бири ызындан эки айны берилмей турса, «Газпром межрегионгаз Нальчик» ООО газны тыяргъа эркинди. Ызгъа жангыдан къошулурча уа къайтарып энтта да тёлерге тюшерикди. Борчларын жабаргъа ашыкъмагъанладан а аны ишни сюдге жетдирип аллыкъдыла.

Дагъыда бир эсгертиу: счётчикге, аны юсюнде тагъылгъан пломбалагъа юйню иеси жууаплыды. Ала тапсыз болсала,  газны багъасы нормативге кёре тергелликди. Сора приборну тинтиу кезиую чыкъса да,  ол алай боллукъду. Ишни анга жетдирмезча,  счётчикге кёз жетдире туругъуз, хайырланыргъа жараулу заманына да сакъ болугъуз. Пломбасы юзюлгенин кёрсегиз а, суратха тюшюрюп, узакъгъа созмай компаниягъа билдиригиз. Сора битеу этилген ремонтланы юсюнден къагъытланы, заявленияланы да тас этмей кесигизде тутугъуз.