Республиканы от ёчюлтюучюлери – эм игилени санында

Ставрополь крайда СКФО-да эм иги от ёчюлтюу-къутхарыу службаны айырыу эришиуню экинчи кесегини эсеплери чыгъарылгъандыла.

Эришиуге округдан кеслерини регионларында хорлагъан 7 къауум къатышхандыла. Республикабызны атындан ары 19-чу от ёчюлтюу-къутхарыу бёлюмню келечилери баргъандыла, командабызгъа Аслан Шогенов, Роберт Каншоков, Астемир Яхтанигов, Залим Бароков киргендиле, къауумну келечиси уа Мусукланы Даниял болгъанды.

Сынаула керти болумлагъа къаршы къуралгъандыла, хорлар ючюн, къутхарыучулагъа, усталыкълары бла чыныгъыуларындан сора да, теория эм практика жаны бла билимлерин да кёргюзтюрге керек болгъанды. Теория кесегинде ала газ-тютюн къыйын болумда этилирге тийишли мадарланы юсюнден соруулагъа жууапла бергендиле, ол санда солуу аппаратлада ишлеуню болжалларыны, урунууну къоруулауну жорукъларыны, аппаратсыз солургъа жарамагъан жерледе къутхарыу ишлени тамамлауну юсюнден да.

 Практикада уа толу экипировкада, аркъаларына да снаряженияны жюклеп, от жана тургъан жерлери болгъан жолну терк ётюуде сынашхандыла. Къызыулукъ, тютюн, артыкъ абери кёрюнмеген болумлада ишлеу аланы къарыуларын, психология чыдамлыкъларын, хар бири ишин  къалай билгенлерин толу ачыкълагъанды.

Сынауланы тийишлисича ётюп, республикабызны келечилери ючюнчю жерни алгъандыла.