Низамлыкъ жашауну сакълар

Элбрусда полициячыла бла къутхарыучула таугъа ёрлерге сюйгенлеге къоркъуусузлукъну жорукъларын эсгертгендиле.

Туристле эм гидле бла тюбешиулеринде ала ёрлеуге къалай хазырланыргъа керек болгъанын, тикледе сакълыкъны магъанасын ангылатхандыла. Жолоучулукъгъа чыкъгъанларыны юсюнден МЧС-ге билдирирге, эсепге тюшерге кереклисин белгилеп айтхандыла.        

Къутхарыучула белгилегенлерича, эсепге салыннган къауум къыйын болумгъа тюшсе, аны тапхан, болушхан да тынчыракъды. Таула адамны саулугъуна бла жашаууна къоркъуу уллу болгъан жерге саналадыла. Жолгъа атланырдан алгъа, адамла къаллай чырмаулагъа тюберге боллукъларыны, хауа болумланы юсюнден да сагъыш этерге, анга кёре экипировканы бла снаряженияны алыргъа тийишлидиле, дегендиле. Аны бла чекленмей, альпинист кереклени хаух берген жерледе да солугъанла бла ангылатыу ушакъла бардыргъандыла, акциягъа къатышханланы барысына да къоркъуусузлукъну жорукълары орус эм ингилиз тилледе жазылгъан эсгертиу китапчыкъланы юлешгендиле.

МЧС-ни регионда Баш управлениясында чертгенлерича, быллай жумушла таулада къыйын болумланы, ачыгъанланы санын азайтыр муратда толтуруладыла.