Юй ишлерден алгъа, жерни чеклерин тохташдырыгъыз

Роскадастрны Къабарты-Малкъарда бёлюмю эсгереди: жерге иелик къагъытыгъыз болгъанлыкъгъа, ол аны чеклери ЕГРН-де жазылгъан шартлагъа келишгенин кёргюзтмезге боллукъду. Ол а неге келтирлигин бу материалда айтып ангылатайыкъ.

Инсан участка къоллу болуп, аны кадастр эсепге салады эмда ЕГРН-ден выписка алады. Алай анда уа ол жерни чеклери халатла бла жазылыргъа неда кёргюзтюлмей къалыргъа окъуна боллукъдула. Адам а анга эс бурмай, участканы хунасына неда башха белгилерине къарап, алайда юй сюеп башлайды.

Уллу кёллюлюкню хатасындан, ишленнген юй къыралны жерине (жол неда тротуар) чыгъаргъа, электрокюч, газ, суу ызланы къорууланнган тийрелерине неда къоншуну участкасына кирирге боллукъду. Ол ачыкъланса уа (тинтиулени кезиуюнде, чеклени тохташдыргъанда, юйню сатханда неда аны башханы атына кёчюргенде),  администрация неда къоншу сюдге берликдиле. Ол а жашау журтну законсуз ишленнгеннге санап, иесине аны кеси ахчасына оюп кетерирге борч саллыкъды.

Быллай тапсыз затлагъа тюбемез ючюн,  ЕГРН-ден выписка алып, жерни чеклерин билирге керекди. Ала халатла бла жазылып неда арталлыда тохташдырылмагъан эселе,  кадастр инженерни чакъырыргъа тюшерикди. Бу специалист, геодезия тинтиуле бардырып, участканы чеклерин жик-жиги бла тохташдырады эмда межевой план хазырлайды. Ол план бла уа жерни иеси Росреестрге барып, жангы билдириулени ЕГРН-ге кийирирча заявление береди. Ызы бла кадастр инженер участканы хар мюйюшюнде белгиле орнатып, инсаннга аны чеклерин туура этеди. 

Юйню жаланда ол белгилени ичинде салыргъа жарайды. Кеси да къалайда сюйсегиз угъай, чекге эм азындан юч метр жетмей алай. Муниципалитетлени хар бирини да аны бла байламлы жорукълары бардыла. Дагъыда, къурулуш ишлени башлардан алгъа,  администрациягъа билдирип, андан эркинлик алыргъа тийишлиди.