Ичгини къоркъуусуз ёлчеми жокъду, бютюнда сабийге

РФ-ни Саулукъ сакълау министерствосу 3-9 августда сабийге ёшюн салыуну хайырлылыгъын ангылатыуну ыйыгъын бардырады. Ол а баланы саулугъу анасыны жууаплылыгъында болгъанын ангылатыуну ахшы кезиуюдю.

КъМР-ни Психиатрияны бла наркологияны клиника арасыны врачы-наркологу Милана Барагунованы айтханына кёре, ёшюн салыу къагъанакъны саулугъуна хайырлы болгъаны бла бирге сабийни бла ананы араларында байламлыкъланы къураргъа эм кючлерге болушады. Алай тиширыу ичги затла, наркотикле хайырлана эсе, аны сютю сабийге хата салады.

- Аракъы сютге терк сингеди, аны ичсе, сабийни айныуу бузулады,  жукъусунда кемчиликле башланадыла, бирде нерва системасы  бузулады. Наркотикледен заран да уллуду: баланы санлары ууланадыла,  жюреги, солуу системасы осалгъа буруладыла, аны ахыры  аман бла бошалыргъа къоркъуу уллуду: ол акъылындан кем болургъа, терс айныргъа боллукъду,-дейди нарколог. 

 Ичгини къоркъуусуз ёлчеми жокъду, деп эсгертеди ушакъ нёгерибиз. «Сиз неда жууукъ адамыгъыз  ичгичилик бла ауругъанын ангылай эсегиз,  саулукъгъа багъыуну мычымай башларгъа керекди. Бизни клиникада аурууну хорларгъа, толу жашауну бардырыргъа болушургъа битеу онгла бардыла. Сабий къоркъуусуз болумлада, саулукълу болуп ёсерге эркинди. Алай эсе уа, бек алгъа ананы саулугъундан башларгъа керекди»,-дейди Милана Руслановна.