Акъылбалыкъ болмай да жарайды ахча ишлерге

Бизни къыралда инсан иш къурап, къармашып башлар ючюн анга эм азындан 14 жыл толургъа керекди. Ол кеси да аны ата-анасы ыразылыкъларын билдиргенлеринден сора. Бу амал, адам тутмай жумушла жалчытыу бла кюрешип, тюрлю-тюрлю ишле тындырып, кеслери чыгъаргъан продукцияны сатып файда ишлерге умут этгенлеге келишеди, деп билдиргендиле Къабарты-Малкъарда МФЦ-дан.

Адам не бла кюрешсин, бу амалны сайласа,  налог тёлерге керек боллукъду. Эсепге уа ма бу къауумла турургъа эркиндиле:

- Россей Федерацияны инсанлары, сора тыш къыралланы бизде болжал халда жашаргъа эркинлик берилген инсанлары;

- Оналты жыллары толуп, кеслерин кечиндирирге онглары болгъанла, ол санда юйюр къурагъанла эмда урунуу келишим бла ишлегенле;

- Онтёрт жыллары толуп, ата-аналарындан ыразылыкъ алгъанла.

Акъылбалыкъ болмагъанла ма бу ишле бла кюреширге эркиндиле:

- суратха эмда видеогъа тюшюрюу;

- татлы ашарыкъла этиу;

- жумушла къурау эмда тамамлау;

- къол бла этилген затланы сатыу;

- интернет бла ишлеу;

- алыучулагъа абериле ташыу.

Эсепге смартфоннга «Мени налогум» деген приложенияны орнатып неда Федерал налог службаны сайтына кирип турургъа боллукъду. Сюйсегиз а, «Госуслуги» къырал порталны хайырланыргъа эркинсиз. Бир-бир банкланы приложенияланы да бередиле быллай амал.