Таулада, айланч-къыланч жолла бла

Къабарты-Малкъарда бла Шимал Осетияда ата журтлу квадроциклланы сынау барады,  деп билдириледи Курортла эм туризм министерствону сайтында.

Былтыр бу тюрлю техниканы жарашдыргъанла сынауланы СКФО-ну сегиз субъектинде бардыргъан эселе, быйыл экисин сайлагъандыла. Аны сылтауу регионланы табийгъатларыны  энчиликлериндеди: бийикликлени 3125 метрге дери тюрлениулери, къыйын агъач жолчукъла, ташлы ауушла… Ала къоркъуулу  болумла  къурайдыла. Компанияланы инженерлери айтханларыча, техниканы кемчиликлерин тюзледе ачыкълар онг жокъду, таулада уа ала шарт кёрюнедиле. Баш жорукъ – квадроцикл Кавказны тау жолларында барала эсе, башха жерледе да анга тыйгъыч боллукъ тюйюлдю. 

Сынауланы дагъыда бир борчу – ата журтлу туризмни айныта, Россейде жолоучулукъла къоркъуусуз, сейир да болгъанларын кёргюзтюудю. Жолоучула техниканы къарыусуз жерлерин ачыкълагъанларындан сора да, жолланы халларына, связь амалланы таплыкъларына, кече къайда къалыргъа боллугъуна, къыйын жерлерине да къарайдыла. Аланы эсеплерин а артда туризм арала бла гидле жангы жолоучулукъланы жарашдыргъанда хайырланадыла.