Минги тауда къурулуш барады

Аслам халда бардырыллыкъ ишле бу айны ахырына дери созуллукъдула. Ары ма быллай объектлени къурулушу киреди: 4100 метр бийикликде къонакъ юй, ресторан, сора лыжачылагъа трассаланы эмда канат жолланы проектлерин жарашдырыу, деп билдиргендиле Кавказ.рф къырал акционер биригиуден.

Жай кезиуде тау бийикледе къар азыракъ болгъаны бла быллай ишле жангыдан башланнгандыла. Ары дери уа РФ-ни экономиканы айнытыу министрини орунбасары Сергей Назаров, КъМР-ни Башчысы Казбек Коков эмда талай ведомствону келечилери бла бирге «Эльбрус» курортну айнытыу жаны бла ишчи къауумну кенгешин бардыргъандыла. Андан сора Сергей Назаров Кавказ.РФ-ни  башчысы Андрей Юмшанов эмда компанияны келечилери бла бирге курортха барып, анда ишлене тургъан объектлеге кёз жетдиргенди.

Минги тауда быйыл хайырланыугъа экиси берилликди - EL6 канат жолда ресторан эмда ратракланы гаражы. Энтта да ондан артыкъ объектни къурулушлары уа энди башланырыкъды.

Экономиканы айнытыу министрни орунбасары «Онбиреуленни ышыгъы» къонакъ юй ишленирик жерге къарагъанды. Къурулушчула 4100 метр бийикликде эски ышыкъдан къалгъан багъана маталлы мурдорну чачып, жангысын жарашдырыргъа хазырлана тура эдиле. Трансформатор подстанцияда да реконструкция ишле башланнгандыла.

Къара-Башы чыранны къатында спортчула сау жылны жараула этип турурча талай тюрлю канат жол ишленирикди. Аланы проектлерин жарашдырыргъа конкурс бардырыллыкъды.

Быйыл май айны ахырында Россейни Главгосэкспертизасы Кавказ.РФ-ге курортну кюнчыгъыш жанында сегиз жангы трасса ишлерге эркинлик бергенди. Келир юч жылны ичинде анда уллу къурулуш бардырыллыкъды. Лыжачыланы ары бизни къыралда этилген «Аэрис» деген эркин кабинала чыгъарлыкъдыла.

Курортну тапландырыугъа энчи эс бурулады. «Ярус» архитектура бюрону жангы проекти станцияланы ишлерин эмда тийрелерин жангыдан къурайды, дерге боллукъду. Эки минг метр бийикликде туристлеге аллай жерде хауагъа келиширге керекди, аны ючюн станцияла солуу тийреле кибик боллукъдула.

Къонакъла «Шахарчыкъ» деген альпинист комплексге да кёз жетдиргендиле. Ол 3800 метр бийикликде орналгъан, кеслеринде да аш этерча, солурча бар онглары болгъан аламат жашар жерчикледиле.