Пилни юлгю алырча къылыкълары

Пилни бир къыралдан башхасына, самолёт бла элтирге тюшсе, сёз ючюн, Индиядан Америкагъа. Ол тургъан жерни энди аякълана башлагъан тауукъ балачыкъладан толтурадыла. Алай нек этедиле? Пил  уллу санлы болгъанына да къарамай, бирлеге хата этерме деп бек къоркъады эмда темир къанатлы жетер жерине  келгинчи жеринден тепмей, тёрт аягъында сир сюеледи. Самолёт учхан кезиуде, билмей окъуна да тауукъ балачыкъладан бирин малтап къоярма деп,  сагъайып турады. Алай бла самолёт да ары, бери  аумай, тюзюнлей барады. Пилге уа ол  аны ариу къылыкълы болгъаныны шагъатыды.

Пилни кесин алай жюрютгенине сейир этген алимле аны  мыйысын тинтгендиле эмда бу жаныуарлада урчукъгъа ушагъан клеткалары болгъанларын ачыкълагъандыла. Ол тюрлю нейронла адамда да бардыла. Аладыла  акъылгъа, башханы  ангыларгъа, сезерге эмда олсагъатда болумуна тюшюнюрге, къайгъы этерге болушханла. Къыйын социал ишлеге да ала жууаплыдыла. Башхача айтханда, ала пилни жаланда уллу саны угъай, уллу ич дуниясы да болгъанын кёргюзтедиле. Ол  сезе, ангылай, жарсый биледи эмда къаллай оюмну да, уллу акъылманча, тынгылауну басып этеди.

Табийгъатны бек сюйген, билген, аты дуниягъа белгили художник Леонардо да Винчи, ол деменгили санлы жаныуарны  юсюнден былай жазгъанды: «Пил тенгликни, тюзлюкню, акъыллылыкъны эмда тёзюмлюлюкню юлгюсюдю. Дагъыда былай къошханды: Суугъа кирсе, ол хар осал затдан да тазаланыргъа  сюйгенча жууунады. Жолда бара,  пиллени башха къаууму алларына тюбесе, хата этмез ючюн, аланы бурну бла акъыртын бир жанына тюртеди.

Бютюнда бек сейири уа: пил ёллюгюн билсе, жыйындан кетип, узакъда, кеси жангызлай ёледи. Нек? Гитчелени ёлюм бла байламлы  жюреклерин къыйнамаз ючюн.