Быйылны аллындан башлап республикабыздан энчи аскер операциягъа къатышхан 103 ветеран Россейни Социал фондуну реабилитация араларында багъылгъандыла, деп билдиредиле фондну регионда бёлюмюню пресс-службасындан.
Фондну къарауунда аллай 12 ара барды, санатор-курорт багъыуну болжалы 21 кюндю. Инсан къаллай бир заманны багъылырыгъы аны халына кёре тохташдырылады, хар ветеран бу амал бла жылгъа 1 кере хакъсыз хайырланыргъа боллукъду. Санаторийге барыр ючюн, заявленияны фондну жер-жерли бёлюмюнде неда къырал жумушланы порталында толтурургъа боллукъду. Анга санатор-курорт багъыугъа - №070/у, медицина реабилитациягъа уа - №057/у жорукъла бла жарашдырылгъан справкаланы къошаргъа тийишлиди. Анга 2 ишчи кюнню ичинде къаралып, ючюнчю кюннге жууап жиберилликди. Энчи аскер операцияны Россейни Жигити деген атны алгъан ветеранлары неда биринчи къауумда сакъатлыкъ берилгенле багъыугъа къагъытны кезиуню сакъламай алыргъа эркиндиле.
Эсгертиу: фондну регионда бёлюмю ветеранлагъа заявленияны толтургъанларындан башлап багъыуну бошагъынчы болушлукъ этедиле. Бёлюмню башчысы Николай Баков белгилегенича, ала ветеранланы тилеклерине не заманда да тынгыларгъа хазырдыла. «Ала, солуудан неда багъыудан сора сёлешип, ыразылыкъларын айтсала, олду эм хычыуун. Ыспас сёзлери, саулукълары игиленнгени уа ишибизни эм ахшы эсебидиле», - дейди ол.
Алай бла быйылны биринчи жарымында ветеранла санатор-курорт багъыуну бла реабилитацияны «Волга», «Волгоградский», «Вятские увалы», «Кристалл», «Тинаки» аралада ётгендиле. Санаторийлени толу тизмесин фондну сайтыны «Реабилитация арала» деген бёлюмюнде кёрюрге боллукъду.
