Жылы аш бла жалчытыу – тийишли даражада

Озгъан  окъуу  жылда Къабарты-Малкъарда жылы аш бла хакъсыз халда биринчи-тёртюнчю класслагъа жюрюгенлени барысын да – 46 214 адамны – жалчытхандыла. Мектепледе аш-азыкъ бла жалчытыуну къураугъа 632,8 миллиондан кёп къоратылгъанды. Ырысхыны асламысы – федерал, къалгъаны уа республикалы эмда жер-жерли бюджетледен бёлюннгенди.
Окъуучуланы льгота тийишлилерине тутхучлулукъ этиу жаны бла иш да андан ары бардырылгъанды. Саулукълары бла байламлы чекленнген онглары неда сакъатлыкълары болгъан 1860 сабийге хакъсыз аш кюннге эки кере берилгенди. Юйлеринде туруп окъугъан 822 сакъат жашчыкъгъа эмда  къызчыкъгъа уа ай сайын компенсация тёленнгенди. Мектепледе, андан сора да, саулукълары бла байламлы энчи  халда мардалы аш тийишли болгъан сабийле ючюн да диеталы эмда саулукъгъа заран тюшюрмеген аш-азыкъны хазырлау да тынгылы къуралгъанды.
Бешинчи-онбиринчи класслагъа жюрюгенледен а хакъсыз жылы аш бла  саулайда 8438 окъуучу жалчытылгъанды. Аланы санында уа энчи аскер операцияда болгъанланы, къолайсыз эмда кёп балалы юйюрлени сабийлери да бардыла.
Социология жаны бла тинтиулени эсеплерине тийишлиликде, ол а РФ-ни Жарыкъландырыу министерствосуну оноууна кёре бардырылгъанды, Лячинкъая элни экинчи номерли орта мектеби къыралда школ аш-азыкъны хазырлауну эмда къурауну качествосу бла экинчи жерге чыкъгъанды. Сагъынылгъан тинтиулеге уа ата-аналаны бла окъуучуланы 94,6 проценти къатышханды.
Быйыл майда «Мектепни эм иги ашханасы» Битеуроссей эришиуню регион уруму бизде ючюнчю кере бардырылгъанды. Анда Нальчикни бла Элбрус районну мектеплеринден къауумла хорлагъандыла. Школда эм ахшы ашны хазырлагъаннга уа Басхан шахарны окъуу махкемелеринден бирини келечиси саналгъанды, деп билдириледи КъМР-ни Башчысыны Администрациясыны МАХ-да каналында