Электрокюч бла жалчытыуда тюрлениулени юсюнден

Белгилисича, 2026 жылда 1 июльдан башлап, Къабарты-Малкъарда электрокюч бла жалчытыу ишни жангы компания (ЕГП) тындырады. Ары дери аны бла кюрешген «Каббалкэнергону» борчу уа энди электрокюч мюлкню тап халда тутууду. Бу тюрлениуле не бла байламлы болгъаныны, хайырланыучулагъа ала не зат берлигини юсюнден ЕГП-ны башчысы Лев Кузнецов айтханды.

Оноуну магъанасы

Электрокюч бла жалчытыу эмда аны жибериу жумушланы экисин да шёндюге дери «Россети Шимал Кавказ» компания тындырып тургъанды. Алай законну излеми уа былайды: ала бла башха-башха биригиуле кюреширге керекдиле. Аны себепли СКФО-да Чеченден къалгъан башха республикаланы ток бла жалчытыуну андан чыгъарып, «Ставропольэнергосбыт» компаниягъа бергендиле, аны атын а алгъаракъда «ЕГП-гъа» тюрлендиргендиле.

Андан сора да,  бар эдиле сылтаула. Ол санда тёлеу низамны кючлендириу, абонент базаланы тийишдириу, къолдан- къолгъа тёлеу амалны азайтыу эмда жангы технологияланы сингдириу.

Низам дегенде, Дагъыстанны бла Ингушетияны санамаса, башха республикалада аны хатасы жокъду, дегенди Кузнецов. Ол адамланы юсюнден айтханда. Алай ЖКХ-да уа болум къайда осалды. «Бир-бир регионлада адамла кёп къалмай бары да жууаплы къарайдыла борчларына, ток ючюн заманында тёлейдиле. Мында статистика къыралда орта кёрюмдюден окъуна игиди. Алай жашау журт-коммунал мюлкню юсюнден а алай айтырча тюйюлдю», - дегенди ол.

Хайырланыучуланы саны да ишеклик туудурады. Тинтиуле башланнган биринчи ыйыкъны ичинде жаланда Ингушетияда эсепде турмагъан минг бла жарымгъа жууукъ абонент ачыкъланнганды.

Адамла не зат этерге керекдиле?

Алагъа хазна зат тюрленмегенди. Лев Кузнецов белгилегенича, жангы келишимле этерге, лицевой счётланы да алышыргъа керекмейди. Жаланда ма бу юч жумушну тындырыргъа тийишлиди:

1. 15 июльгъа дери токну багъасын,  алгъынча,  «Россети Шимал Кавказгъа» тёлерге.
2. 1 июльдан башлап, 25 июльгъа дери счётчикни кёргюзтюулерин жангы компаниягъа жиберирге, ол санда powerofcity.ru сайт бла.
3. 15 августха дери уа токну багъасын ЕГП-гъа тёлерге.

Алай бла тюрлениу жангыз бирди – квитанцияда ахчаны аллыкъ компанияны аты «Единый Гарантирующий Поставщик» дегеннге алышынады. «Аллай жазыу бла квитанция келсе,  къоркъмай тёлегиз - ол тюз къагъытды», -дегенди компанияны башчысы.

Тарифле алгъынча къаладыла

Компания тюрленнгенликге,  тарифле башха боллукъ тюйюлдюле, шёндюча алай къаллыкъдыла. Аланы оноуун не замандача тийишли органла этедиле.

Тёлеу амалла да сакъланырыкъдыла. Токну багъасын энчи кабинетледе эмда онлайн-сервисле бла, банклада эмда почтада, сора компанияны кассаларында тёлерге жарарыкъды. Аны юсюне энтта да жангы бёлюмле ачаргъа умутла бардыла. Бегирекда узакъ элледе. «Хар не да адамлагъа таплай къалырча этерге таукелбиз», - деп ышандыргъанды Лев Кузнецов.

Умутла

Ишин башлагъан биринчи айлада жангы компания тёлеу низамны сакъларгъа умутлуду. Алгъын жыллада бола тургъан быллай тюрлениулени кезиуюнде ол осалына кетген тёре болгъанды. Аны себепли баш мурат – системаны эмда адамла бла байламлыкъны бузмай сакълау.

Цифралы сервислени эмда мобильный приложенияны уа аз кечирек чыгъарлыкъдыла. Аланы жарашдырырдан алгъа башха регионлада сынамгъа да къараллыкъды.

Улбашланы Мурат.