Мюлк налогдан ким эркин этиледи?

Адамланы мюлклерине налог тёлеуден пенсиячыла бла ветеранла эркин этиледиле. Аны толусунлай неда бир кесегин инсанланы дагъыда къайсы категориялары тёлемезге боллукъдула — бу материалда айтабыз. Аны КъМР-де МФЦ-ны билдириуюне кёре  жарашдыргъанбыз.

Мюлк налогну адамланы барысы да тёлерге борчлу тюйюлдюле. Андан толусунлай эркин этилген инсанланы толу тизмеси бла РФ-ни Налог кодексини 407-чи статьясында шагъырейленирге боллукъсуз. Аланы арасында ма была да бардыла:

* Совет Союзну эмда Россей Федерацияны Жигитлери, дагъыда Махтауну орденини юч даражасы бла саугъаланнганла;
* I эм II къауум сакъатла, сабийликден сакъат болгъанла эмда аллай сабийле;
* Аскерде къуллукъ эте,  Уллу Ата журт урушха эмда СССР-ни къоруулау жаны бла башха аскер операциялагъа къатышханла, дагъыда партизанла;
* Чернобыль АЭС-де авария салгъан хатаны кетериуге къатышханла;
* Жыйырма эмда андан аслам жыл аскер къуллукъ этген аскерчиле эмда алгъын аллай бир заман къуллукъ этгенле;
* Юйюр башчыларын тас этген (аскерчилени) юйдегилери;
* Пенсиячыла;
* Къуллукъ борчларын толтура туруп жан берген аскерчилени эмда къырал къуллукъчуланы ата-аналары эм эрлери/юй бийчелери.

Была уа жеринден тепдирилмеген мюлкню хар тюрлюсюнден бир объект ючюн налог тёлемезге боллукъдула. Льгота бу излемле толтурулсала бериледи:

- Мюлк предпринимательство (бизнес) ишде хайырланылмай эсе;
- Аны кадастр багъасы 300 миллион сомдан озмай эсе;
- Сылтауланы санына къарамай, налог тёлеучюню сайлауу бла льгота хар мюлк тюрлюсюнден къуру бир объектге бериледи.