Айырыула ачыкъ эм бузукълукъсуз ётерча

Къабарты-Малкъарда Россейни Къырал Думасыны IХ чакъырылыууна бла республиканы жер-жерли самоуправление органларына депутатланы айырыула бузукълукъсуз ётерине жууаплы жамауат къараучуланы хазырлау башланнганды, деп билдиредиле Жамауат палатаны пресс-службасындан.

Бу кюнледе юйретиулени Нальчикде айырыулагъа къарарыкъла ётгендиле. Аланы хазырлагъанланы къауумуна илму ишчиле, устазла, жамауат биригиулени, Жамауат палатаны келечилери киргендиле, юйретиуню программасын а «Жалынчакъсыз жамауат эсеплеу» биригиуню экспертлери хазырлагъандыла.

Алай бла къараучула теория жаны бла билим алгъанларындан тышында, айырыучу законодательство бла шагъырейленедиле, жамауат къараучугъа къаллай борчла салыннганларына, аланы къалалй эркинликлери болгъанына тюшюнедиле, сынау айырыу участкада уа ол билимлерин бегитедиле. Айырыулагъа къарарыкъ жамауаи штаны келечиси Жамауат палатаны аппаратыны башчысы Анна Дьяченко чертгеннге кёре, хар айырыу участкада жамауат къараучула болурлары уллу магъананы тутады. «Быйыл Жамауат палата 800 чакълы бир къараучуну хазырлайды. Алда кёп иш сакълайды, нек дегенде быйылгъы айырыулада Къырал Думагъа, республиканы жер-жерли самоуправление органларына да айырыула бир жолгъа ётерикдиле. Бу жаны бла сынамыбыз барды, анга кёре айырыула бийик даражада къуралырларына ышанырчады. Бюгюнлюкде Россейде быллай 89 регион штаб ачылгъанды, республкиабыз жол картаны излемлерин тамамлауда эм иги 20 субъектни санына киргенди», - дегенди ол. Жамауат къараучуланы хазырлау бир ыйыкъны бардырыллыкъды, юйретиулеге республиканы битеу районлары къошулурукъдула.