Тёбени тасхаларын ачыкълайдыла

Нальчикде Идаров атлы орамда «Западная Базисная» деген курганда къазыу ишле барадыла, деп билдиргендиле КъМКъУ-дан. Алагъа вузну тарых бёлюмюню окъуучулары да къатышадыла. Экспертлени башчылыкълары бла ала эки минг жылдан артыкъ болгъан катакомба маталлы къабыр тапхандыла анда. Студентлеге бу окъуу практиканы объектде «Эрмитаж-Кавказ» деген культура-билим бериу ара къурагъанды.

Курганны къазып быйыл майда башлагъандыла. Алайда артда къурулуш ишле бардырыллыкъдыла да, аны ючюн, тышындан келген археологла бу эсгертмени тинтирге керекдиле.

Биринчи табылгъан артефакт керамика болгъанды. Ызы бла тинтиучюле жаныуарланы эмда адамны сюеклерин тапхандыла. КъМКъУ-ну студентлери уа археологла курганны башын ачханларындан сора къатышып башлагъандыла ишге.

Тергеулеге кёре, бу къабыр бек эскиди, сарматланы кезиулерине (бизни эрагъа дери III – бизни эрада I ёмюрле) келишеди. Алай ол артда да хайырланылгъанына ушайды. Нек дегенде, аны тёгерегинде уруда энтта да тёрт адамны сюеклери табылгъандыла. Ала бла бирге уа бирер буунлукъ бла билеу таш, сора ат эмда ит сюекле да бар эдиле. Аланы барын да тазалап, тинте турадыла. Ахырында уа хар табылгъан зат КъМР-ни Миллет музейине берилликди.