Юйде адам жашамай эсе, газ ючюн тёлерге керекмиди?

Аны юсюнден тийишли законодательствода айтылгъаннга кёре, юйню, фатарны, жеринден тепдирилмеген мюлкню не тюрлюсюню да иеси ары келген газ ючюн заманында эмда толусунлай тёлерге борчлуду. Алай анда бир жан да жашамай эсе уа иш къалай боллукъду? «Газпром межрегионгаз Нальчик» предприятияда анга жууап бергендиле.

«Жашау журтла эмда шахар болум» миллет проектини чеклеринде Къабарты-Малкъарда къадар кёп фатарлы юй ишлене барады. Кёбюсюнде фатар бош турады, ичинде киши да жашамайды, анда бир адамны да регистрациясы окъуна жокъду, алай газ ючюн квитанцияла жазылып турадыла.

Законда айтылгъаныча, газ ызлагъа къошулгъан фатарда кёк отлукъ ючюн тёлеу жазылып турады. Аны адам хайырланамыды огъесе угъай – бир тюрлю башхасы жокъду. Анда инсанны регистрациясы этилмегенликге да,  ол коммунал тёлеуледен эркин болмайды. Эсеплеген прибор жокъ эсе, тёлеу тийишли нормативлеге кёре тергелликди. Аны ючюн а бошуна тургъан фатарда быллай къоранчланы азайтыр ючюн газ счётчик салыргъа керекди.

Фатарда аллай прибор бар эсе, адам жаланда анга кёре тёлерикди. Алай аны кёргюзтюулерин кезиуюнде жиберип турургъа керекди. Жукъ да къоратылмагъан эсе да, алай. Аны унутсагъыз, нормативге кёчюрлюкдюле. Бу жумушну «Энчи кабинетде» тындырыргъа боллукъду. «Акъыллы» счётчик орнатсагъыз а, кёргюзтюулени ол кеси жиберип турлукъду. Жууукъ кезиуде ол фатарда бир адам да жашарыкъ тюйюл эсе, газны тыяргъа боллукъду. Аны этерча предприятия бла келишимни тохтатыргъа тийишлиди.

Борч бар эсе, аны жапмай къутулургъа амал жокъду. Эки айны ичинде тёленмей турулса, «Газпром межрегионгаз Нальчик» ООО газны кесерикди. Ол эмда ызына къошхан жумушну къоранчларын да абонентни боюнуна саллыкъдыла.