Россейли окъуучула – ишексиз чемпионла

 Россейни жыйымдыкъ къаууму  Тунисде тамата класслада окъугъанланы арасында киберкъоркъуусузлукъдан бардырылгъан халкъла аралы олимпиадада ишексиз чемпион болгъанды. Алай бла, къыралны миллет командасы тёрт майдалны къытханды.

Ахыр урумда россейли школчула 19 къыралны келечиси бла тюбешгендиле. Аланы арасында уа Бразилиядан, Къытайдан, Италиядан, Сингапурдан, США-дан окъуучула да болгъандыла.

Хунерлиликлери ючюн энчи халда алтын майдалла бла Москваны «Педагог усталыкъны арасыны школу» мектебинден Даниил Мелехов, къыралны ара шахарыны 2031-чи номерли мектебинден Николай Белоусов алгъандыла. Жашла экиси да онбиринчи классха жюрюйдюле.

Кюмюш майдалгъа уа Москваны Овчинников атлы «Экинчи школа «Лицей» окъуу махкемесинден Артём Румянцев тийишли болгъанды. Къазан шахарны «Къазанны халкъла аралы школасы» мектебинден Роман Черемных а «доммакъны» алгъанды.

Жашланы олимпиадагъа уа Ара университетни эмда «Касперскийни лабораториясыны» киберкъоркъуусузлукъ жаны бла белгили алимлери хазырлагъандыла. Андан сора да, ала быллай эришиуге былтыр Сингапурда къатышхан окъуучуларыбызны хазырлагъан эдиле.

Хорлам болдургъан жашланы вице-премьер Дмитрий Чернышенко алгъышлагъанды. Ол аланы жетишимлери бла ёхтемленнгенин билдирип, аллай фахмулу жаш тёлю тарихли технологияланы келир заманда айныуларына къошумчулукъ этерикле болгъанын чертгенди. Окъуучуланы насийхатчыларына бла ата-аналарына да тутхучлулукъ этгенлей, кёллендиргенлей тургъанлары ючюн ыразылыгъын билдиргенди.

Хунерли жашланы бийик жетишимлери бла РФ-ни жарыкъландырыу министри Сергей Кравцов да алгъышлагъанды.

- Сиз жаланда майдаллагъа тийишли болуп къалмай, чемпион атны алгъаныгъыз бла бирге,  саулай да дуниягъа  россейли окъуучуланы билим жаны бла  хазырлыкълары бийик даражада болгъанын ачыкълагъансыз. Бюгюнлюкде информациялы къоркъуусузлукъ бизни къыралыбызгъа къыйматлыды. Сизни жетишимигиз а технологияланы айнытыуну ышаннгылы жолуду. Бюгюнлюкде сиз къыралны кадрла жаны бла ёсюуюне да  къошумчулукъ этесиз. Биз сизни бла ёхтемленебиз,-дегенди Сергей Кравцов.

Энди 2027 жылда киберкъоркъуусузлукъдан халкъла аралы олимпиада Къыбыла Кореяда бардырыллыкъды. Бюгюнлюкде уа аны къурау бла кюрешгенле майданланы жарашдыра, жюрини келечилерини къауумун эмда эришиуге къайсы къыралланы окъуучулары къатышырыкъларын тохташдыра турадыла.