Ыразы болуп кетгендиле

Бу кюнледе  «Россейде иш. Онгланы кезиую»  деген ат бла битеуроссей ярмарканы федерал кезиую Къабарты-Малкъар  гуманитар-техника колледжде да бардырылгъанды. Бизни республикада эм баш  майданладан бири да ол эди. Бу майданны сайлау бошдан болмагъанды, нек дегенде колледжни мурдорунда  санларында къыяулары болгъанланы юйретиу жаны бла окъуу-методика ара,  КъМР-ни  Алчы профессионал хазырлыкъны арасы, «Абилимпикс» регион  къымылдау, «Правону сакълау эмда башчылыкъ этиу»  бёлюм да бардыла. Аланы себепликлери бла жаш адамла  мастер-классланы жетишимли ётгендиле. \

Ярмаркагъа келгенле,  компанияланы келечилери бла тюбешип, бюгюнлюкде алада бек суралгъан  къаллай ишчи жерле болгъанларын, алада урунур ючюн къаллай билим, усталыкъ да алыргъа кереклисин билгендиле.

Иш бла жалчытыргъа хазырла да кёп эдиле. Ала предприятиялада тюрлю-тюрлю усталыкълада  ишлерге боллукъ жюзден  артыкъ ишчи жер болгъанын билдиргендиле. Ишчилени уа «ВоенТекстильПром» ООО-ну фабрикасы, республикалы клиника больница, «Радуга» гимназия, 14-чю номерли гимназия, Сабийлени чыгъармачылыкъларыны «Кюн шахар» академиясы, 2-чи номерли больница, 61-чи сабий сад, Москваны «Синергия» университетини регион бёлюмю, башхала да сурайдыла.

Жаш  адамлагъа жюреклери тартхан ишлерин табаргъа болушуу эмда жамауат бла байламлыкъ жюрютюу жаны бла республикалы араны келечилери ол кюн жаш адамла бла  ушакъла этгендиле, мастер-классла да бардыргъандыла. Аллай амалла иш излегенлеге уллу болушлукъ этгенлери баямды. Экспертле дагъыда иш излегенде артыкъда бек неге эс бурургъа кереклисини юсюнден да айтхандыла.

Майданда кесини энчи иели ишин къурап бардырыргъа умут этгенлеге энчи эс бурулгъанды. Аллайлагъа  тюрлю-тюрлю тренингле да къуралгъандыла.

- Бу ярмарка  иш излегенлеге неда бир башха усталыкъгъа юйренирге сюйгенлеге себеплик этген бек аламат амалды. Былайда иш бериучюлени иги кесеги  жыйылады, алагъа къаллай сюйсенг да, аллай соруу берирге боллукъса. Компанияланы келечилери уа иш излегенле бла энчи  ушакъла  бардырыргъа онг табадыла. Ол а оноучу бла биринчи  тюбегенде,  кесинги хунеринги, билиминги да кёргюзтюрге онг береди,-дегенди  КъМР-ни гуманитар-техника  колледжинде «Абилимпикс» къымылдауну башчысы Сатаней Курашева.

Ол кюн кёпле  жюреклери жаратхан ишлерин  тапхандыла.