Солууну магъаналы ушакъдан башлагъандыла

Озгъан байрым кюн «Антарес»  жаш тёлю лагерьге солургъа республиканы хар районундан, элинден, шахарындан  биринчи къаууму келгенди – битеу да 70-ге жууукъ сабий. Ол кюн окъуна  жашчыкъла бла къызчыкъла,  бир бирлери бла танышып, лагерьни жашаууна киришгендиле – «Къабарты-Малкъар – саулукълу жашауну жери» деген тюбешиу-сёлешиу-оюннга къатышхандыла.

Аны алагъа КъМР-ни Саулукъ сакълау министерствосуну, КъМР-де Ич ишлени министерствосуну,  Тимбора Мальбахов атлы Миллет китапхананы медицина жаны бла адабият бёлюмюню, Саулукъну жамауат арасыны келечилери эмда медицина жаны бла аналитикле къурагъандыла.

Тюбешиу Наркоманиягъа къажау битеуроссей айлыкъны чеклеринде бардырылгъанды. Сыйлы къонакъланы араларында уа КъМР-ни жарыкъландырыу эмда илму министрини орунбасары Екатерина Мисостова,  КъМР-де МВД-ны Наркотиклени жюрютюуге контроль этиу жаны бла управлениясыны энчи магъананы тутхан ишле жаны бла тамата  оперуполномоченный, полицияны подполковниги  Ирина Давыдова да бар эдиле.

Солургъа келген жашчыкъланы бла къызчыкъланы  «Антарес»  лагерьни тамата устазы-юйретиучюсю Руслан Имзаков алгъышлагъанды. «Биз бери осал къылыкълагъа «Угъай!» деп, къаты айтыргъа,  спорт, билим эмда шуёхлукъ – ала барысы да керти да аламат болгъанларын кёргюзтюрге деп жыйылгъанбыз. Сизни бюгюн беш станция сакълайды. Аланы хар биринде сизге тюрлю-тюрлю соруула, тамамларгъа керекли ишле да берилликдиле. Тюз эмда терк жууап бергенле балла къоллу боллукъдула. Бютюн кёп балл алгъан команда уа «Къабарты-Малкъарны саулукълу чемпионлары» деген атха тийишли боллукъдула», –  деп билдиргенди ол.           

Екатерина Мисостова да насийхат сёзлерин айтханды: «Биринчиден, республиканы оноучулары сиз не къадар тынгылы солуп, саулугъугъузну да кючлендирип, кюч-къарыу  алып юйлеригизге алай къайтыр ючюн,  бир затны да аямайдыла. Мында тургъан жыйырма бир кюнню ичинде кёп затны билирсиз,  кёпге юйренирсиз, бек башы уа – кесигизге бютюнда аслам шуёхла табарсыз, деп ышанабыз.  Бюгюн сизге, быллай ариулагъа, тирилеге, фахмулулагъа къарай, жюрегинг къууанады, кёлюнг кётюрюледи.  «26.06.26» – ол  насыпны белгисиди да, насыплы болугъуз!»

Ирина Давыдова уа наркотиклеге къажау битеудения акция бардырылгъанын эсге салгъанды. «Ол не ючюн къуралгъанды: арт бир ненча жылны ичинде наркомания бютюн кенг жайыла эмда миллетни социал жашаууна уллу хата келтирип, къоркъуу окъуна салады. Аны  «жаш» болуп баргъаны уа бютюнда тынгысыз этдиреди. Наркотиклеге табыннганланы санына акъылбалыкъ болмагъанла эмда жаш адамла кёпден-кёп къошула барадыла. Ол а  къыралыбызны келир заманына –  аны  келир тёлюсюне уллу къоркъуу салады», – дегенди тюбешиуде полицияны подполковниги.

Дагъыда тюбешиуде «Кесинги эмда шуёхларынгы ол палахдан къалай къутхарыргъа боллукъду?», «Наркотикле сатханланы  ауларына тюшмез ючюн, не этерге керекди?» деген атлары бла ушакъла бардырылгъандыла.

Къонакъланы баш борчлары жаш тёлюге наркотиклеге къаллай палахлагъа келтирирге боллугъун ангылатыуду. Анга алданнган адам кеси кесин, юйюрюн, келир заманын да  тас этгенине тюшюндюрюудю.

Андан сора оюн башланнганды. Сабийле, беш къауумгъа юлешинип, хар бири кеси жерлеринде берилген ишлерин тамамлагъандыла.

Китапханада ишлегенле  уа «Наркоманияны юсюнден не затны билирге керекди», «Наркотиклесиз келир заманны сайлагъыз» деген атла бла  китапчыкъла юлешгендиле эмда  наркоманиягъа къажау  жангы китапланы юслеринден хапар айтхандыла. 

Акъылбалыкъ болмагъанла  ушакъгъа тири къатышхандыла,  кеслерини оюмларын да ачыкъ айтхандыла. Ахырында уа къызчыкъла, жашчыкъла да  саулукълу жашау халны бардырыу неден да иги болгъанын, аны ючюн а  спорт, физкультура, чыгъармачылыкъ ишле бла кюрешиу, шуёхла бла олтуруп ушакъ этиу къайда иги болгъанын чертгендиле.