Бызынгыгъа суу тартылгъанда

Окъуучуларыбыз эрттегили эллерибизде алгъыннгы жашауну юсюнден жазарыбызны, эски суратланы да басмалай турурубузну тилейдиле. Бюгюн ол тилекни толтура, 1964 жылда алыннган суратладан бирин басмалайбыз. 

Ол Черек ауузуну узакъ тау эли Бызынгыгъа биринчи кере быргъы бла суу келген заманда алыннган эди. Ол 1964 жылда болгъанды. Ары дери эллиле сууну юйлеринден узакъгъа барып, черекден, тауладан саркъгъан гитче черекчикледен алып тургъандыла. 

Бу суратда бызынгылы тиширыуланы быргъыдан чыкъгъан суугъа къууаннганларын кёрюрге боллукъду. Аны элге келтириуге Эл советни ол замандагъы таматасы Холамханланы Сахай уллу къыйын салгъанын да белгилерчады. Суу ызны къурулушуну баш инженери эмда проектни жарашдыргъан да Шахмырзаланы Саидни жашы Юрий болгъанды. 

Суу элге келгенден сора, элли тиширыуланы жашаулары да женгилирек болгъанды. Бюгюнлюкде Бызынгыда хар юйде жылы эмда сууукъ суу чыгъады, газ, ток да бардыла. Ара орамгъа асфальт салыннганды, юйлени арбазларында киминде плитка, киминде асфальтны кёрюрге боллукъду. Мектеп, сабий сад, тюрлю-тюрлю тюкенле, ашханала да ишлеп турадыла, туризм айныйды. Эллилени жашаулары, къолайлары да кюнден-кюннге игилене, монглу бола баргъанын кёрюрге боллукъду.