Окъуучулагъа – алгъышлаула, устазлагъа – ыспас сёзле

Мектепледе ахыр къонгъуроула эшитилдиле, ЕГЭ-ле бошалдыла. Озгъан шабат кюн а, битеу къыралдача, бизни республиканы мектеплеринде, маданият юйлеринде да къууанчлы ингирле болдула. 

Керти да, аламат, эсде къалырча ингир Хасанияны 16-чы номерли мектебинде да болгъанды. Окъуу юйню устазлары аны  тап къурар ючюн къолларындан келгенни аямагъанлары кёрюнюп тура эди. Арбазда – чатырла, аланы тюплеринде – шинтикле, сахна уа бир заманда да болмагъанча омакъ жасалгъанды. 

Къууанчха келгенлени иги кесегини къолларында гюлле бардыла. Алайсыз а къалай! Быйыл мектепни жыйырма тогъуз жаш бла къыз бошагъандыла, аладан тёртеулен – алтын, тёртеулен да кюмюш майдаллагъа, башхалары уа спортда, мектепни жамауат жашауунда, республикада, шахарда бардырылгъан тюрлю-тюрлю конкурслада, олимпиадалада хорлагъанлары ючюн дипломлагъа, сертификатлагъа, грамоталагъа, башха белгилеге тийишли болгъанладыла.

Къысхасы, мектепни талай жылны ичинде атын иги бла айтдырып тургъан акъыллы, фахмулу эмда башхалагъа ушамагъан, онбир жылны ичинде бир бирлери бла шуёхлукъда жашагъан, кеслерине, устазларына, ата-аналарына да айып келтирмеген классны сабийлеридиле ала. 

Къууанчлы ингир а  РФ-ни, КъМР-ни байракъларын кётюрюу, гимнлерин согъуу бла башланнганды. Ол сыйлы ишни онбир жылны ичинде эм иги окъуп келген Баккуланы Азамат бла Гузойланы Амина тамамлагъандыла.

Жаш адамла,  биринчи классны бошагъан жашчыкъланы бла къызчыкъланы къолларындан тутуп, сахнагъа чыкъгъанларында, келгенле, алагъа сый берип, ёрге туруп тюбегендиле.

Мектепни бошагъанлагъа кёпле алгъышла, насийхатла да айтхандыла. Аланы араларында директорну къуллугъун толтургъан Жарашууланы Эльмира, аны орунбасары Холамханланы Юля, Билим бериу департаментни бёлюмюню таматасы Елена

Аутлова, ата-аналаны атларындан Этезланы Залина, дагъыда, башхала бар эдиле. Окъуучула да, устазларына ыразылыкъларын билдире, кёп ыспас сёзле айтхандыла. 

Талай жылны алагъа  мектепни таматасыны кенгешчиси, билимин, жюрек халаллыгъын, бет жарыкълыгъын да аямагъан устаз Улбашланы Джамиля башчылыкъ этгенди. Ол, устазлыкъ, башчылыкъ этиу бла чекленип къалмай, окъуучулагъа тамата шуёх да эди. Аны ышарыуу аланы  алгъа барыргъа кёллендиргенди, сёзю уа ышаныулукъ бергенди. Сабийлени хунерликлерине ийнаныуу уа кеси  кючлерине базыныргъа таукеллендиргенди. Ол классыны жашауу бла жашагъанды. Ол  ышара эсе, хар зат да тап боллугъуна ийнаннгандыла сабийле.

Къууанчны магъаналы кезиую да башланды. Жарашууланы Эльвира бла Холамханланы Юля мектепни бошагъанлагъа алтын, кюмюш  майдалларын, аттестатларын, грамоталарын да бериуге киришгендиле. Жыйылгъанла уа аланы алгъан жаш адамлагъа  толкъун къарсларын аямагъандыла.

Байрамда   мектепни бошап чыкъгъанланы атлары  бла къысха назмула окъулгъандыла, сый берилгенди. Белгили жырчыларыбыз КъМР-ни сыйлы артисти Мусукаланы Руслан, Жуболаны Жамболат, Тюменланы Жаннет, Токумаланы Джамиля жыйылгъанланы, мектепчилени да жырлары, тепсеулери бла кёллерин кётюргендиле.

Жауун жаугъанына да къарамай, ингирге келгенле ахырына дери майдандан  кетмегендиле.