Дарманны орунуна – тирилик

8-14 июньда Россейни саулукъ сакълау министерствосу тириликни саулукъгъа хайырлылыгъын ангылатыуну ыйыгъын бардырады. Аны чеклеринде КъМР-ни  Саулукъ сакълау министерствосуну Психиатрияны бла наркологияны клиника арасыны келечилери тирилик дарман жарашмагъан кезиуде окъуна болушханын эсгертедиле.

- Аракъы, наркотикле, ахча оюн адамны мыйысыны ишин бузадыла: дофамин жетмей башлайды, неда кемчиликле бла ишлейди. Алай дайым спорт бла кюрешген адам жаяу жюрюсе, чапса, сууда жюзсе дофамин ызына  къайтады, - дегендиле бизге клиникадан.

 Тири  кезиуде адамны санлары эндорфинле чыгъады. Наркоманла уа ууну бу сезимлени излеп  тартадыла. Алай бла адам, санларын бузмай, спорт бла кюрешип, саугъасын алаллыкъды.

 Бирде адам бир затха къайгъырса, жарсыса, аны унутур ючюн аракъы тартады. Алай     башынгы жарсыуладан жайыкъландырыргъа бокс, йога, алача башха тириликле ичгиден иги болушурукъдула.   

- Эсигизде болсун: спорт бла кюрешип башлагъынчы, врач бла кенгеширге керекди. Алай осал къылыкъланы къоюп, саулугъугъуз игиге айлана башласа, спорт сизни болушлукъчугъуз боллукъду. Бюгюн окъуна башлагъыз:  Интернетде керексиз видеолагъа къарагъандан эсе, орамгъа чыгъып, 15 минутну жаяу айланыгъыз, - деп чакъырадыла клиниканы келечилери.