«Къаты диеталаны къоюп, жилекледен сыгъылгъан суу ичигиз, шоколад ашагъыз»

Сёзсюз, тюз диагнозну  анализледен сора жаланда врач салалады.  Алай  ауругъан  жеригизни ангылап,  заманында саулугъугъузну  иги жанына кесигиз да бурургъа боллукъсуз. Врач Балаланы Танзиля айтханнга кёре, адамны бетинде кёп зат жызылыпды.

- Адамны кёз тюплеринде  къаралдым тамгъаланы къалай кетерирге боллукъду?

- Кесигизде  аллай зат эслеген эсегиз, ол  бек арыгъаныгъызны белгисиди.  Сууда жюзюу бла  санларыгъызны ууу  болушурукъдула.  Массажны кючю уллуду! Къаты диеталаны къоюгъуз, жилекледен сыгъылгъан суу ичигиз, шоколад, къозула ашагъыз.

- Кёзледе тамырчыкъла терк-терк атылсала уа?

- Ол жукъламагъандан эм кислородну жетмегенинден болургъа боллукъду (сёз ючюн, метрода кёп барыргъа тюшсе).Ол кёзлени ичинде басымны кётюрюлгенини белгисине да саналады. Тамырчыкъла терк - терк атыла эселе, аны бла бирге башха ышанла да чыгъа эселе – желкеде ачытыу, башыгъызны бургъанда, къыйын кёрюнюу, къулакъларыгъызда  шууулдау, зынгырдау – неврологга мычымай атланыгъыз.  Мыйыгъызда къанны жюрюую бузулгъанды.

- Адамны кёз акъларында сары тюрсюнню эсленнгени нени кёргюзтеди?

- Ол бауурда бла ётде чурумланы белгисиди.  Жаланда къыздырыучу ичги бла терк хазырланнган ашладан сора да, анга стрессле да сылтау боладыла  (медикледе «офисный панкреатит» деген ангылам окъуна  барды).

Аш эритиу жаны бла чурумла  аш орунубузну бла чегилерибизни  тапсыз къысдырып,   терс олтургъаныбыз ючюн чыгъып къалыргъа да боллукъдула.  Тепмегенлей бир жерде алты сагъатдан кёп чёгюп туруу а ични къатханына  сылтауду.

-  Эрттен сайын кёз тюплени  кёпчюгенлери  да терк – терк тюбейди.

- Ол бюйреклени бла  къууукъну ауругъанларыны белгисиди: баям, сиз  кеч ашап, аланы ауурландыра болурсуз.  Жукълардан алгъа кёп суу ичмезге эм  тузлу ашамазгъа кюрешигиз.  Бюйреклеге гранат игиди (аны жартычыгъын ашагъыз неда сууундан жарым стакан ичигиз),  спаржада болгъан аспарагин да сизге болушлукъчуду, сельдирейде аминокислотала уа теригизни тюбюнден артыкъ сууланы чыгъарыргъа себеплик этерикдиле, брюссель хобуста да файдалыды.

- Къуруда жукъламай турууну хатасы неди?

- Жукъламай тургъанда  санда - чархда мелатонин жетмей тебирейди (ол жаланда  жукълагъан кезиуде чыгъарылады). Аны сылтауундан алгъа ууакъ къан тамырчыкълагъа  - капиллярлагъа - заран тюшеди  (ол а кёз тюплени къаралтады). Ызы бла уа  уллу тамырланы  да тозуратады, аны эсебинде уа жюрек къарыусуз болуп башлайды.

- Тилни халы уа не затны юсюнден айтады?

-  Тил аз къызгъылдым тюрсюнлю болургъа керекди.  Аны юсюнде акъсылдым тамгъалары бар эсе,  аш орунугъузда бла чегилеригизде чурумланы излегиз, саргъылдымла  бауурну ауругъаныны белгисидиле, кёксюлдюм тюрсюн эслене эсе уа,  жюрегигизге сакъ болугъуз.