ФСБ: Жазадан къутулалмагъандыла

Къоркъуусузлукъну федерал службасы Россейни Следствие комитетини, МВД-сы эмда Федерал налог службасы бла бирге «Экологистика» ООО-ну башчысы Р.Г. Кочесоков къалгъан-къулгъанланы жыйыу эмда кетериу, тёгерекдеги къудуретни къоруулау бла байламлы  налогладан албугъартып тургъанын ачыкълагъанды.  

Излеу-тинтиу ишлени кезиуюнде тохташдырылгъаныча, Къабарты-Малкъар Республикада «Экологистика» ООО къырал келишимлени толтургъан заманда налогланы азайтыр мурат бла налогла бла байламлы эсеплени терс кёргюзтюп тургъанды. Аны киши ангыламаз ючюн а, биркюнлюк фирмала хайырланылгъандыла.

Налог органлагъа берилген бухгалтер эмда налог эсепледе уа ётюрюк къоранчла кёргюзтюлгендиле. Ол а налоглагъа тёленнген ахчаны бир кесегин къайтарыр ючюн этилгенди.

Компанияны башчыларыны Москва шахарда, Москва областьда, Къабарты-Малкъарда бла Къарачай-Черкесде юйлеринде эмда организацияланы офислеринде тинтиуле бардырылгъандыла. Аланы законсуз ишлерине шагъатлыкъ этген документация, цифралы шартла да табылгъандыла.

Толу болмагъан тергеулеге кёре къыралны казнасына келтирилген заран 500 миллион сомдан артыкъ болгъанды.

Россейни Следствие комитетини Москвада Баш следствие управлениясы РФ-ни Уголовный кодексини 199-чу статьясыны 2-чи кесегинде кёргюзтюлген эки аманлыкъ этилгенине ишекликде уголовный иш ачханды.