Саугъала эмда кёллендириу сёзле

РусГидрону Къабарты-Малкъарда бёлюмюню келечилери КъМР-ни Сабий фондуну башчысы Светлана Умова бла бирге республиканы онкология диспансеринде багъыуда болгъан сабийлеге саугъала алып баргъандыла, деп билдиргендиле гидроэнергетика компаниядан.

Жандауурлукъ жумуш Сабийлени къоруулауну кюнюне аталгъанды. Онкодиспансерде багъылгъан гитче саусузланы бири да унутулмагъанды, барысына да саугъала берилгендиле. Аланы ата-аналарыны да ариу сёз эмда эс буруу бла кёллерин кётюргендиле.

Бу жумушну баш мураты сабийлеге насыплы чакъла сынатхан, алагъа къайгъырыулукъну сездирген эмда жангыз кеслери болмагъанларын эсге салгъан болум къурауду. Быллай магъаналы багъыуну кезиуюнде не аз да эс буруу жюрекге къууанч эмда игиликге ийнаныуну салыргъа боллукъду.

«Бизге къуру регионну ток бла ышаннгылы жалчытыу угъай, социал жаны бла жууаплы болуу, бютюнда къайгъырыуну излегенлеге кёл этдириу бек багъалыды. Быллай тюбешиуле ишибизге энчи магъана бередиле. Бюгюн биз гитче саусузлагъа бир кесек жылыулукъ, эс буруу эмда иги кёллюлюк берирге кюрешдик. Хар сабийни ышаргъаны – ол эм багъалы эсепди. Жюрекден ышанабыз, бу кёл этдириу бла къатларында болуу жумуш алагъа себеплик этерлерине, алгъа барыргъа кюч берирлерине», - деп белгилегенди бёлюмню жамауат бла байламлыкъланы жалчытхан келечиси Абдуллаланы Гульнара.

Социал жаны бла себеплик этиу жумушлагъа РусГидро не заманда да уллу эс бурады, ишлеген регионларында жандауурлукъ эмда жамауатха магъаналы ишлеге тири къатышады. Сагъынылгъан диспансерни коллективине эмда жандауурлукъ фондха да байламлыкъла къурап, огъурлу ишлеге къатышыргъа чакъыргъанлары ючюн ыспас этеди.