Сабийлени саулукъларына – энчи эс

Быйыл жылны башындан бери Къабарты-Малкъарда акъылбалыкъ болмагъан 98 мингден аслам сабий диспансеризацияны ётгендиле. Ол планда белгиленнген къауумну 57,7 процентиди, деп билдириледи КъМР-ни Саулукъ сакълау министерствосуну пресс-службасындан.
Тинтиулени кезиуюнде ата-ана болургъа чырмау этерге боллукъ аурууланы, бузукълукъланы тинтирча аслам эс бурулгъанды. Алай бла эсеплеге кёре, 9 мингден артыкъ сабийден 590 тынгылы тинтилирге жиберилгендиле.  
Ёксюз эм сакъат сабийлени саулукъларына да тынгылы эс бурулады. Сагъынылгъан кезиуде 866 ёксюзню бла 291 сакъатны саулукъларын тинтирге онг табылгъанды. Алай бла врачланы оноулары бла 264 сабий санаторийледе бла курортлада саулукъларын кючлерикдиле. Андан сора да, 74 гитчеге уа реабилитация бардырыллыкъды. 
Эсге сала айтсакъ, быллай амал сабийни халине бирде иги да алгъадан эс бурургъа эм башлана тургъан къыйын аурууланы аманында ачыкъларгъа болушады. Аны кезиуюнде тийишли специалистле къарагъанларындан сора, эсгертиуле этедиле, ишекли болсала, тынгылы къаралырча мадарла этедиле.