Иги кесек соруугъа къаралгъанды

Къабарты-Малкъарны Регионнга оноу этиу жаны бла арасы (ЦУР)  республиканы инсанлары бла власть органланы арасында байламлыкъны жалчытырча эм чыкъгъан соруула къысха заманда  тамамланырча ишни  тири бардырады.  Аланы кёбюсю социал сетьледе «Telegram», «Одноклассники», «ВКонтакте» кётюрюлген «Инцидент Менеджмент» системаны амалы бла жарашдырылгъан проблемаладыла. 

Анга кёре озгъан айда Арагъа социал  сетьлени себеплиги бла тёрт  мингнге жууукъ соруу берилгенди.  Аланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау бла байламлыдыла. Специалистле, аланы хар бирине  тынгылы къарап, профильлерине кёре  тийишли ведомстволагъа билдиргендиле.

Тарыгъыуланы кёбюсю Нальчик бла Прохладный шахар округлада эм Урван муниципал районда жашагъанладан келгенди.  Алгъа заманда жууап берилирча иги кесек сакъларгъа тюшгени  кёплеге тап болмагъанды. Энди уа, орта эсеп бла алып айтханда, бир сагъат бла жарымдан  кёпге созулмагъаны ишни бютюн жетишимли бардырыргъа онг тапдырады.  

Сагъынылгъан кезиуде ЦУР республиканы  районларында тийишли инстанциялы себеплиги бла эркинликсиз  кир-кипчик тёгюлген жерлени  къурутургъа,  жылыу,  таза суу бла жалчытыргъа, жолланы жангыртырча, кече   жарытырча эм башха жумушланы тамамларгъа болушхандыла.
ЦУР озгъан айда социал сетьледе кётюрюлген жарсыулагъа аслам халда эс бургъан муниципалитет къурамланы бла регион ведомстволаны эсеплерча тёрели рейтинг да ётдюргенди.

Эсеплени чыгъарырдан алгъа сорууланы къаллай бир заманны ичинде тамамланнганларына, тынгылы толтурулгъанларына эм башха шартлагъа да эс бурулгъанды. Алай бла бу жол биринчи жерге КъМР-ни Саулукъ сакълау министерствосу тийишли болгъанды. Экинчи, ючюнчю жерлеге Транспорт эмда жол мюлк бла Урунуу эмда социал къоруулау министерствола  чыкъгъандыла.

Муниципалитетлени юсюнден айтханда, биринчи жерни Нальчик эм Прохлад шахар округланы администрациялары биринчи бла экинчи болгъандыла.  Урван   район  ючюнчю жерге чыкъгъанды. Рейтинг  биринчи кере 2021 жылда бардырылып тебирелгенди.  Аны магъанасы толтуруучу власть органла бла жер-жерли самоуправленияланы ишлерине багъа бичергеди эм власть бла жамауатны арасында байламлыкъны айнытыргъады.

Андан сора да, «Жарсытхан соруула» рубриканы чеклеринде  студияда къонакъда  КъМР-ни къурулуш эмда жашау журт-коммунал мюлк министрини къуллугъун толтургъан Андрей Журавлев бла сабийни эркинликлери жаны бла уполномоченный  Амина Бадракова болгъандыла.

Андрей Иванович быйыл 15 майдан башлап Къабарты-Малкъарда зыбыр къалгъан-къулгъанланы кетериу жаны бла «Экологистика» орунуна жангы «Экотехпром» регион оператор ишин башлагъанын, анга салыннгын, борчланы, тарифлени, кир-кипчикни жарашдыргъан заводу бла жангы полигон къураллыгъыны юсюнден айтханды эм башха шартлагъа эс бургъанды. Ахырында  журналистлени сорууларына жуууапла бергенди.   

Амина Сафраилова да тюзюнлей эфирни кезиуюнде сабийни  эркинликлерин къорууларча,  юйюрлеге болушлукъ тапдырылырча этилген жумушланы юсюнден  хапарлагъанды эм тынгылаучула берген соруулагъа да жууаплагъанды.

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча социал сетьлени биринде сагъынылыргъа  эм  тынгылыракъ ачыкъланыргъа  керекди.