Ана ахчагъа мингден артыкъ сертификат берилгенди

Ана капиталны программасы алгъынча къырал болушлукъну эм уллу мадарларындан бириди. Быйылны аллындан бери Социал фондну Къабарты-Малкъарда регион бёлюмю аны чеклеринде 1100 сертификат бергенди, деп билдиргендиле бу ведомстводан.

Февраль айны биринчисинде бу тёлеуню ёлчеми 5,6 процентге уллуракъ болгъанды, аны хайырындан биринчи сабий ючюн энди - 728,9 минг, экинчи сабийге уа (биринчисине сертификат алынмагъан эсе) — 963,2 минг сом бериледи. Юйюр биринчи сабийге ахчаны алгъан эсе, экинчиси туугъанда 234,3 минг сом тёленеди.

2020 жылдан бери бу жумушну Социал фондну регионда бёлюмю хайырланыучуладан заявление излемей тамамлайды. Туугъан сабий эсепге тюшсе, ЗАГС органладан билдириу ары кеси аллына жетеди. Анда уа беш кюнню ичинде ана капиталны сертификатын аны иесини «Госуслуги» порталда «энчи кабинетине» жибередиле.

«Заявление бермей къабыл этиу халгъа эмда цифралы сервислеге кёчюу бу сертификатны алыуну эмда аны хайырланыуну бек тынч этгенди. Бюгюнлюкде Къабарты-Малкъарда юйюрлеге ведомствогъа келип айланыргъа керекмейди, жаланда къырал жумушланы порталын хайырлансанла тамамды», – деп белгилегенди бёлюмню таматасы Николай Баков.

Электрон сертификатны алгъандан сора, юйюр бу ахчаны хайырланыу бла байламлы заявление берирге боллукъду. Аны жашау болумну игилендириуге, школгъа дери билим бериуге, юч жылгъа дери сабийге хар айлыкъ тёлеуге, сакъат сабийлени социал адаптацияларына товарла эмда жумушла сатып алыугъа неда къалгъан ахчаны бир кереге къолгъа алып къоратыргъа боллукъду.

Программаны жорукълары аладан бирин сайларгъа неда ахчаны талайына юлеширге эркинлик бередиле. Сертификатны тюз къолгъа алгъанлай окъуна хайырланыргъа боллукъду.

Къабарты-Малкъарда бу ахчаны асламысында жашау болумланы игилендириуге къоратадыла. Дагъыда быйыл биринчи беш айыны ичинде республикада сегиз жюзден аслам юйюр ана капиталны болушлугъу бла ипотека кредитлерин толусунлай неда бир кесегин жапхандыла. Аны хайырланып, энчи юй ишлегенле неда аны къурулушун бошагъанла да бардыла.