Онкология араны къурулушу къыстау барады

Бюгюнлюкде Нальчикде «Узакъ ёмюр эм тири жашау» миллет проектге кёре къыстау жангы излемлеге келишген   Онкология диспансерни къурулушу барады. Ол ишлеп башласа, саусузла бийик технологиялы болушлукъ алыргъа онг табарыкъдыла, деп билдириледи КъМР-ни Саулукъ сакълау министерствосуну пресс-службасындан.

Айтханыбызча, проект санитар-эпидемиология мардалагъа бла излемлеге келиширча тюрлендирилгени себепли жарты ишленип къалгъан объектни талай жерлерин оюп кетерирге эм кенгертирге тюшгенди.   Жангы диспансерни уллулугъу 24 минг квадратха жетерикди эм кёп къатлы алты  багъыу  блокладан къураллыкъды. Барында да саусузлагъа 250 жер боллукъду. Дагъыда бир сменагъа жюз адамгъа къарар онглары болгъан поликлиника да ачыллыкъды. Мында лучевой, химиотерапия, хирургия эм кюндюз жатханлагъа багъарча стационар да къураллыкъды.

Аны хирургия корпусунда алты уллу эм эки  гитче операция этген заллары боллукъду. Аны бла бирге экинчи  къатында  эндоскопия,  фотодинамика  диагностика эм терапия бёлюмле ишлерикдиле. Аланы хайыры бла аурууну башлана тургъан кезиуюнде тинтирге онг табыллыкъды.  Ол санда аш орунлары бла чегилери ауругъанланы да.

Радиология блокда лучевой терапия бла  опухольгъа радиация этип  багъарыкъдыла. Андан сора да, радиоэмболизация да этилликди. Аны кезиуюнде радиациялы материалны къан тамырла бла ауруу къозгъалгъан жерге   жиберликдиле.

Саулай алып айтханда,  жангыртылгъан медицина арада онкология бла байламлы аурууланы къайсы бирине да багъарча мадар этилликди.

Бюгюнлюкде планда   белгиленнгенича,  корпусланы барысы да сюелтилиннгендиле. Аланы тёртюсюнде тыш къабыргъаларын сюртюп эм  ичлеринде жумушла бла кюрешедиле. Ишлени кезиуюнде лифтле да салынырыкъдыла. Стационар бла поликлиника орналлыкъ  «А» бла «Б» блоклада уа ахыргъы ууакъ-тюек жумушла тамамланадыла.

Проектге кёре къурулуш ишлени быйылны ахырына бошаргъа керекдиле. Келир жылда уа  тийишли оборудованияны салып хайырланыргъа берликдиле.