Къоркъуусузлукъну жалчытыугъа аслам эс бурулады

«Россети Шимал-Кавказ» компанияны Къабарты-Малкъарда бёлюмюню – «Каббалкэнергону» специалистлери регионну билим бериу учрежденияларында сабийлени ток уруудан сакълау жаны бла кёп тюрлю мадар этедиле.
Сабийлени солуу кезиулери башланырны аллында Нальчик шахарны электросетьлерини энергетиклери республиканы Промышленность, энергетика эм сатыу-алыу министерствосу бла бирге болуп, школланы, сабий садланы эмда спорт майданчыкъланы ичлеринде эмда къатларында орналгъан электрокюч ызланы бла трансформатор подстанцияланы тинтедиле.
Эм биринчиден, ала киритле тынгылы бегитилгенлерине, буруулагъа, энергетика объектледе къоркъууну юсюнден билдирген эсгертиу белгиле жерлеринде тагъылгъанларына кёз жетдиредиле. Аны бла бу ишни кезиуюнде битеу да 591 энергетика объектни тинтип чыгъаргъа керек эдиле.
Сабийлени ток уруудан сакълау жаны бла жумушланы «Каббалкэнергону» специалистлери комплекс программаны чеклеринде тындырадыла. Ары уа ол санда тематикалы дерсле, конкурсла эм викторинала бардырыу, энергетика объектлеге экскурсияла къурау эмда билим бериу учрежденияланы къатларында орналгъан аллай объектлени техникалы болумларын тинтиу жумушла киредиле.