Билимлерин ёсдюрюрге итинедиле

Тийишли билим бериу программаны чеклеринде Къабарты-Малкъар къырал университетни экономика факультетини студентлери татлы затла чыгъарыучу «Нальчик-Сладость» фабрикада болгъандыла. Жаш специалистлеге экскурсияны аны баш технологу Нина Наумовна бардыргъанды. Ол кёпле сюйген татлы затланы чыгъарыуда хар атламны юсюнден жик жиги бла хапарлап къоймай, компанияны айныууну бай тарыхын да туура этгенди, деп билдиргендиле КъМР-ни

Экономиканы айнытыу министерствосундан.

Бу фабриканы продукциясы Россейни, СНГ-ны эмда тыш къыралланы рынокларына къалай чыкъгъанына энчи эс бурулгъанды, ол а студентлеге аны экспорт жаны бла онгларыны юсюнден толу ангылау бергенди.

Бу экскурсия жаш къонакълагъа усталыкъларын ёсдюрюу жаны бла магъаналы атлам болгъанды. Нек дегенде ол алагъа экспорт стратегияланы жашауда жетишимли бардырыуну керти юлгюсюн ма аны юсюнде кёрюрге эмда шёндюгю урунуу рынокда къаллай хунерле изленнгенлерин ангыларгъа онг бергенди.

Быллай шагъырейлендириу жумушла жаш тёлюде башха къыралла бла сатыу-алыугъа сейир къозгъаргъа себеплик этедиле, миллет эм регион проектлени жашауда бардырыугъа тири къатышыргъа кёллендиредиле.

Бу жумушну КъМР-ни Экономиканы айнытыу министерствосу бла КъМКъУ бирлешип, регионда экспортну айнытыу стандартны амалларындан бирин тамамлауну чеклеринде къурагъандыла. Ол «Халкъла аралы кооперация эм экспорт» миллет проектни кесеги болгъан «Халкъла аралы кооперацияны эм экспортну айнытыуну тынгылы мадарлары» регион проектге киреди.