Русофобиядан «ауругъан» европалы оноучула халкъгъа тынчлыкъ бермезле

Бюгюнлюкде дунияда бола тургъан ишлени юслеринден оюмну жазгъан   бир кесек сабырлыкъны излейди. Нек дегенде Россейни Сауутланнган кючлерини энчи аскер операцияда кюн сайын бандеровчу къауумланы къысадан-къыса  баргъанлары, Зеленскийни бла русофобия бла ауругъан европалы политиклени адыргыгъа къалдырып тебирегенди. Аланы сёлешгенлерине тынгыласанг, билимсизликлери бла къылыкъсызлыкълары битеу тохташдырылгъан мардаладан чыгъадыла. Къырал башчылары уа, официал халда сагъыш этмей, магъанасыз, къолларындан келмезлик затланы айтадыла.

 Неда этип, Россейге къажау сюелирге хазыр болгъан политиклени хаталарындан дуния башында низам осалгъа кетгенин, деменгили къыралланы араларында халкъла аралы право хазна жюрюмей тохтагъанын ангылайса.  ООН жокъну орунундады, дерге боллукъду, аны ишин тюрлендирирге кереклисини юсюнден РФ-ни тыш къыралла бла ишлерини министри Сергей Лавров да бир ненча кере айтханды.

Запад къыралланы асламысы, халкъларына болмачы хапарланы жайып, Россейни терслерге кюрешип, атом саууту болгъан къыралны Евросоюзну баш дипломаты Кая Каллас бла бирге хорларгъа умут этедиле. Бек сейири уа Германия, Великобритания, Швеция, Франция эм башха къыралла экономикаларын аскер жолгъа сала башлагъандыла. Прибалтикалы республикалада политикле уа европалы оноучуланы да озгъандыла. Россей бизге чабыууллукъ этерикди деген сылтаула бла, жерлерине НАТО-ну аскерлерин кийиргендиле, юйрениулени тохтамай бардырадыла, ала чекден озсала, аны ахыры не бла бошаллыгъыны юсюнден сагъыш да этмей.

Энди ала Украинаны хайырланып, бизни къыралгъа къажау сюелгенлери бла чекленмей, Арменияны премьер-министри Никол Пашинянны (Францияны  президентини  Эмануэль Макронну биринчи шуёху)  Зеленский сайлагъан жолгъа сала турадыла. Эрмен халкъ ёмюрледен бери Россей бла шуёхлукъда жашагъанын эсге да алмай. Аны юсюнден РФ-ни Къоркъуусузлукъ советини башчысыны орунбасары Дмитрий Медведев да билдиргенди. Тюнене уа Пашинян бардыргъан политикагъа ыразы болмай, сен сатхычса, деген плакатла бла Ереванда мингле бла адамла къатышхан митинг болгъанды, жете тургъан парламент айырыуланы алларында.

Бу кюнледе уа, Россейге ачыу этебиз деп, бизни къыралда террорист биригиуге саналгъан украинлы миллетчилени башчыларындан бири Андрей Мельникни сюеклерин, Люксембургда къабырындан чыгъарып, Киевге ашыргъандыла. Украинаны шёндюгю оноучулары аны къырал даражада жангыдан асырагъандыла. Зеленскийни къарт атасы Къызыл аскерни санында уруш этгенин ол эртте унутханды. Аны ол ишине Европарламентде Словакиядан депутат Любош Блага окъуна чамланнганды. «Энди Зеленский чынтты фашист болгъанын букъдурмайды - ачыкъ этгенди хар затны да. Бандеровчула урушну заманында къаллай къанлы ишле этгенлерин битеу биледиле,  ол  аланы урушну жигитлеринча асырайды»,- деп жазгъанды  депутат кесини телеграм каналында.

Израильни Тыш къыралла бла ишлерини министерствосу да украинлы миллетчилени этген ишлерине ахырда ыразы болмагъанын мычымай билдиргенди эм нацистлени бла ала жанлы болгъанланы хаталарындан къаллай бир мамыр адам ёлгенин эсгертгенди. 

Сёзсюз, бюгюнлюкде Киевни башчылары башда сагъынылгъан ишле бла нек кюреширге керек эдиле, деген соруу чыгъады былайда, аланы башха къайгъылары болмагъанча. Толу болгъан шартлагъа кёре, Зеленскийни Мельникни асырагъаны бла тохтар умуту жокъду. Ол урушда хал кюнден-кюннге осалдан-осал бола баргъанын да ангылайды. Адамла да къаугъадан арыгъандыла, Евросоюз да  90 миллиард еврону алыкъа ёнкючге бермей турады. Ма ол кезиуде халкъны эсин башха затха бурур умут бла бардырады къужур ишлени, деригим келеди. Мельникден сора да, ол Украинаны барып тохтагъан нацистлери Евгений Коновальцны, Петлюраны, Бандераны эм башхаланы сюеклерин Киевни аскер къабырларында энчи пантеонда асыраргъа умут этеди. 

 Сагъынылгъан шартланы да эсге ала, Польшаны президенти Кароль Навроцкий Зеленскийден ол къыралны эм даражалы орденин «Акъ къушну» - 8 июньда сыйырыргъа оноу чыгъарыргъа айтханды. Нек дегенде «къанлы чамчы» бюгюнлюкде Россейде жюрютюлюрге эркинлиги болмагъан урушну кезиуюнде немисли фашистлени жанында болуп, мингле бла адамланы, ол санда полякланы да къырып айланнган экстремист биригиуню - Украинаны повстанческий аскерини атын Украинаны Сауутланнган кючлерини бир бёлюмю жюрютюрча оноу этгенди. «Зеленский барып тохтагъан бандитлеге бла мурдарлагъа бийик даражаны бергени бла европалы юйюрню бир кесеги бир заманда да боллукъ тюйюлдю»,-дегенди ол.

Заман иги кесек ётген эсе да, адамла унутмагъандыла немисли фашистлени бла аланы да озгъан бандеровчуланы Экинчи дуния урушну кезиуюнде этип айланнган аманлыкъчы ишлерин.  Германияны шёндюгю канцлери Фридрих Мерц немислилени Гитлер сайлагъан жол бла бардырыргъа алланып турады. Европада эм кючлю аскерни къураргъа умут этеди…

Насыпха,  эслерин унутхан европалы политикле кеслерини къыралларында окъуна тюзетир адамла алыкъа бардыла. Германияны школларында тамата класслада окъугъанла: «Мерц, уруш этерге кесинги сабийлеринги жибер» деп,  демонстрациягъа чыгъып, плакатла бла айланнгандыла Берлинде.

Бек ышанама, немисли сабийлеча, эсли абадан адамла саулай Европада да кёп болгъанларына.   Уллу къаугъа къозгъасала, хорлагъан  хазна болмаз.