«Керти белги» татлы ашарыкълагъа да салынырыкъды

Быйыл келир айны биринчисинден башлап, Россейде «Честный знак» системаны чеклеринде шоколад, драже, карамель дегенча аллай татлы ашарыкълагъа эмда чайнаучу чайыргъа борчлу халда тийишли белги (маркировка) салынып башланырыкъды, деп билдиргендиле КъМР-ни Экономиканы айнытыу министерствосундан.

Къабарты-Малкъарда хайырланыучулагъа деп быллай продукцияны (татлы затланы) орунлагъа салып чыгъарыу бла юч предприятие кюрешеди: чекленнген жууаплылыгъы болгъан «Жако», сора «Нальчик-Сладость» эмда «Эльбрус-К» кондитер фабрикала. Алада татлы ашарыкъланы кёп тюрлюлерин этедиле, энди аланы барысына да быллай белги салынырыкъды. Кеслери да, бу ишде тыйгъыч болмазча анга аллындан окъуна хазырланып башлагъандыла.

«Керти белги» деген – ол продукцияны орунунда ишленнген цифралы кодду. Аны ичинде толу билдириуле жашырылып турадыла: аны ким чыгъаргъаны, къошулгъан затлары, сакълауну шартлары, ауурлугъу, аш эмда энергетика жаны бла хайыры (ценность).

Быллай белги салыуну баш мураты – товарны чыгъарыучудан башлап хайырланыучугъа дери баргъан жолуна кёз-къулакъ болууду (ызына тюшюудю). Бир жаны бла ол аны рынокда къалай жюрюгенин толу ачыкълайды, башха жаны бла уа сатыу-алыугъа жалгъан (контрафакт) продукцияны къошулуруна чек салады. Алыучула уа продукция керти неда жалгъан болгъанын «Честный знак» деген мобильный приложенияны ачып,  ол кодну суратха алсала,  олсагъат билликдиле.