Жерлешибизни жангы жетишими

Москваны И.М.Сеченев атлы къырал медицина  университетини 1-чи номерли  клиника больницасында ишлеген жерлешибиз Эфендиланы Къанамат бла Полина Алексеева онкология ауруудан багъыуну жангы амалын тапхандыла.

Бусагъатда  медицинада саусуз клеткаланы  (асламында рак ауруу бла байламлы) жокъ этер ючюн  фотодинамикалы багъыу хайырланылады. Анга кёре, кёпгенни ичине  аз-аздан жыя, дарманны къуядыла. Андан сора ол жерни  лазер бла «кюйдюредиле». Аны бир чырмаулугъу барды -  ол аурууну кёп тюрлюсюдю, багъыу амал а бирди.  Аны себепли артыкъ кёп дарман салыу  адамны сау клеткаларына да хата салады, алай бла кёпгени артха къайтады: бирде бютюн  терк эмда  кенг жайылып.

Къанамат бла Полина жарашдыргъан амал а, саусузну ауруууна кёре лазерни хайырлана туруп, аны адамны  сау клеткаларына хата жетдирмезге онг береди.

Эфендиланы Темботну жашы  Къанамат  Чегем шахарда 3-чю номерли мектепни бошагъанды, Къабарты-Малкъарны  къырал университетни Математика эмда естественный илмула институтунда окъуп чыкъгъанды. Бакалавриатны бошагъандан сора,    Москвада  ядерный тинтиулени «МИФИ» миллет университетине окъургъа киргенди. Магистр атны алып,   РАН-ны Битеулю физиканы институтуну аспирантурасында билимин ёсдюргенди. 2023 жылда  илму ишин жетишимли къоруулап, физика-математика илмуланы кандидаты болгъанды.

Жаш болгъанына да къарамай, Къанамат  тутхан ишинде эм алгъа баргъан специалистледен бири болгъанды, онла бла илму статьялары белгили журналлада басмаланнгандыла. РАН-ны  А.М.Прохоров атлы битеулю физиканы институтуну илму къуллукъчусу болуп ишлегенди. 2025 жылда уа  Москваны Правительствосуну саугъасыны лауреаты  болгъанды.

Ол саугъаны бере, Москваны мэри Сергей Собянин Къанамат тапхан амал   И.М.Сеченев атлы медицина университетни биринчи номерли больницасында  жетишимли хайырланылгъанын айтханды. «Москвада жангы амалны болушлугъу бла адамны   башында, терисинде, боюнунда  рак ауруудан жетишимли багъадыла. Келир заманда ол амалны бютюн  айнытыр мурат барды»,- деп чертгенди.