Санлагъа болушур онг барды

Россейни Саулукъ сакълау министерствосу 18-24 майда эндокринный системаны аурууларына къажаулукъну ыйыгъын бардырады.  Бу кезиуде уа адамны санларында йод жетмесе, неда бал туз артыкъ болса, саулукъгъа къаллай хата тюшгенин ангылатыучудула. Алай КъМР-ни Саулукъ сакълау министерствосуну Психиатрияны бла наркологияны клиника арасыны врачлары ичги, тютюн, башха уулу затла  адамны эндокринный системасына къаллай хата салгъанын эсгертедиле.

 - Гормонла бизни халибизни  къурайдыла, ала тапсыз ишлеселе уа, адам   семиреди неда арыкъ болады, жукъу да аланы ишлерине кёреди. Алай адамны къанына аракъыны, тютюнню, наркотиклени уулары тюшселе, эндокринный система бузулуп башлайды, - деп ангылатхандыла бизге клиниканы пресс-службасындан.

Сёзге, аракъы ашхын тюбюндеги безни эм бюйрек башланы  ишлерин бузады. Аны хатасындан инсулин кётюрюлюрге, неда тюшерге болады. Дагъыда богъурдакъ без  гормонланы жарашдыралмай къалады. Аны хатасындан эр кишилеге тестостеронну орунуна эстроген жаратылады. Сыра сюйген эр кишиле аны ючюн семиредиле.

 Наркотиклени хатасы гипоталамусха жетеди. Ол а адамгъа  ач болгъанын эм тойгъанын ангыларгъа болушады. Дагъыда бюйрек башланы иши бузулады. Алай бла адам солугъанын ангыламай къалады, къуруда арып тургъанча сезеди кесин.

 - Битеу бу затланы айтханыбыз, уулу затланы хатасындан адамны сюеклери назик боладыла, жашлыкъдан  адамда остеопороз къуралыргъа болады. Дагъыда диабетни 2-чи тюрлюсю башланырыгъына къоркъуу уллуду. Гормонла тапсыз ишлеселе, адам  мугурайып, къайгъы этип турургъа да болады,-деп къошхандыла араны келечилери.

Эндокринный  системаны ишин жангыртыргъа боллукъду-наркологну болушлугъу бла. Алай адам санларына салгъан хатаны ангылап, кеси биринчи атлам этерге керекди. Уулу затланы къойгъандан сора, юч айдан инсулин бла кортизол тап халгъа келедиле, гормонланы ёлчеми жангыртылады.