Туризм бёлюмню сынамлы кадрла бла жалчытырча

Арт заманда Къабарты-Малкъаргъа  солургъа иги кесек турист келеди. Сёз ючюн, былтыр аланы саны  эки миллиондан атлагъанды. Республиканы  таулары, дарман суулары эм бай маданият хазнасы да жолоучуланы мукъуладисча тартады.  Болсада къонакълагъа къошула баргъаны бла кадрланы жетмегени да сезиледи. Аны бла байламлы тийишли специалистлени хазырларча республикада не мадар этилгенини юсюнден Къабарты-Малкъар къырал университетни менеджмент, туризм эм къонакъбайлыкъ индустрия институтуну таматасы  Рамазан Лигидов хапарлагъанды.

Ол айтханнга кёре, бюгюнлюкде туризм бёлюмде кадрла 30-40 процентге азлыкъ этедиле. Кёбюсюнде ишчилени жетмегени, туристле аслам келген  Элбрус тау-лыжа курортда бла  саулай Бхсан ауузунда  сезиледи. Бу жаны бла сагъынылгъан институт 2023 жылда болумну игилендирирча тынгылы  кадрланы хазырлауну система амал бла къурарча мадар этгенди.   Анга жыйырма жылны ичинде алгъан  сынау да ахшы болушханды.

 Бюгюнлюкде  мында отельерле бла солууну къурагъанладан сора да,  муниципал районла оноу этериклени да хазырлайдыла. Аны магъанасы республиканы хар жеринде да туризм жаны бла иги  болум къураргъады. 

Специалистлени хазырлауда аслам эс сынамларын кючлеуге  бериледи. Студентле биринчи курсладан окъуна   санаторияла бла курортлада практикаларын ётедиле. Аны бла бирге институт  медицина  туризмни айнытыугъа да  аслам эс бурады.  Ол санда саулукъгъа багъыу эм кючлеу учрежденияланы реестрин эм картасын жарашдырады.   

Жыл сайын вуз жылгъа 120–130 специалистни чыгъарады, аладан иги кесеги неда 75 проценти бёлюмде урунургъа онг табадыла. Андан сора да, туризм жаны бла колледжлени бошагъанла да бардыла. Къалай-алай болса да, кадрла жетмейдиле.  Аны себепли   институт къошакъ халда билим алырча, усталыкъларын ёсдюрюрча да программаланы   бардырады. Ала бусагъатда рынокда болгъан излемлеге кёре ашханадан башлап къонакъ алыугъа дери юйренедиле.   Ол себепден жангы излемле бла шагъырейленирча   турфирмаланы эм къонакъ юйлени келечилери да келирге угъай демейдиле.   

- Бизни борчубуз туристни кесибизге бир кере тартындыргъан бла чекленип къалмай, экинчи, ючюнчю кере да келирча, башхалагъа да махтарча этергеди. Аны ючюн а сервис кимни да сурамына келиширча тынгылы болургъа тийишлиди,- дейди    Рамазан Лигидов.