Таза продукция чыгъаргъанланы ишлерин туура эте

В.М. Коков атлы Къабарты-Малкъар къырал аграр университетни студентлери Улбашланы Залимгери эм Марат Нагоев, профессор Жангоразланы Жансуратны башчылыгъы бла «Органика продукцияны белгили этиу жаны бла эм иги жаш тёлю проект» деген V Миллет органика конкурсну «Сабанладан хапарла» номинациясында хорлагъандыла.

Конкурс Федерацияны Советини башчылыгъы бла бардырылады. Аны РФ-ни Эл мюлк министерствосу эм Роскачество бла бирге ол Советни Аграр - аш-азыкъ политика эм табийгъатны хайырланыу жаны бла комитети къурагъандыла. Анга «Органика» фонд да себеплик этеди.

Кёргюзтюлген материал а КъМР-ни Черек районуну Аушигер элинде органика продукция чыгъаргъан «Бай тирлик» предприятиягъа жораланнганды. Анда аны тарыхыны, органика алмаланы ёсдюрюуню энчиликлерини эмда быллай эл мюлкню саулай аграр бёлюмге магъанасыны юсюнден айтылады.

Материалны баш борчу — шёндю быллай мюлкле экология жаны бла жууаплы жерчиликни амалларын къалай сингдиргенлерин эм органика продукцияны чыгъарыу культурасын къалай къурагъанларын кёргюзтюудю. «Бай тирлик» ООО-ну эмда анда уруннган специалистлени ишлерини юсюнден окъугъанла органика продукцияны чыгъарыуну энчиликлерине тюшюнедиле.

Студентле жарашдыргъан материалда жарыкъландырыугъа да энчи эс бурулгъанды. Публикацияда органика эл мюлк не болгъаны, быллай продукциягъа къаллай излемле салыннганы эм ол кеси да тёрели продукциядан не бла башха болгъаны ангылатылады. Ол хайырланыучуланы саулукълу ашны эм экология жаны бла жууаплы хайырланыуну амаллары бла шагъырейлендиреди.